Tovuzda cari ilin məhsulu üçün kartof əkininə başlanılmış və son məlumata görə, 3300 hektarda kartof əkilmişdir. Əkində, əsasən, yerli və xarici kartof toxumlarından istifadə olunur. Yerli sortlardan "Əmiri-600", "Sevinc", "Telman", xarici sortlardan isə "Alegriya", "Melodi", "Orkestra", "Kolombo", "Silvanna", "Anna Koroleva", "Celli" sortlarına üstünlük verilir. Tovuzda kartofçuluqla məşğul olan çoxlu sayda fermer təsərrüfatları var. Onlar kartofun əkilməsindən tutmuş çıxarılmasınadək bütün işləri texnikaların köməyi ilə həyata keçirirlər. 

Ən çox kartof əkən təsərrüfatlardan biri də "Turqut" MMC-dir. Müəssisə ötən il 100 hektardan məhsuldarlıq 170 sentner olmaqla 1700 ton məhsul götürmüşdür. Ümumiyyətlə, rayonda hər il kartofçuluqda yüksək göstəricilər əldə edən təsərrüfatlar çoxdur. "Tovuz Aqrokompleks" MMC ötən il 92 hektar sahədə kartof yetişdirmiş, hər hektardan 630 sentner olmaqla 5796 ton məhsul toplamışdır. "Azəraqraristehsalat və Emal Birliyi" MMC isə 68 hektardan 3036,60 ton məhsul götürmüşdür. Fiziki şəxs Ədalət Məhərrəmov da yüksək göstəricilərə nal olmuşdur. 30 hektar sahədə kartof yetişdirən fermer məhsuldarlıq 480 sentner olmaqla 1440 ton məhsul əldə etmişdir.

Rayonda ən çox kartof əkən fermerlərdən biri də Bozalqanlı kəndində Kamal Ələkbərovdur. Təxminən hər il 100 hektarda kartof yetişdirən təsərrüfat sahibi hektarda orta hesabla 50 tondan çox məhsul istehsal edir. Mövsüm ərzində 200 nəfəri işlə təmin edən Kamal Ələkbərov əkin sahələrini müasir çiləyici aqreqatlarla təmin edib. Bundan başqa, istehsal etdiyi kartofu saxlamaq üçün təsərrüfatın 3 min tonluq soyuducu anbarı da var.

Tovuz Dövlət Aqrar İnkişaf Mərkəzinin direktoru Emin Eyvazov deyir ki, ölkədə ikinci ən böyük kartof istehsalçısı olan Tovuz rayonunda məhsulun saxlanması üçün də tədbirlər görülür. Ən çox diqqət soyuducu anbarların sayının artırılmasına yönəldilmişdir. Hazırda rayonda 40-a yaxın soyuducu anbar var. Təsərrüfat sahibləri bu anbarların gücündən maksimum istifadə etməyə çalışırlar. Onlar hər il yetişdirdikləri kartofu anbarlara yığaraq qış mövsümündə satışını həyata keçirir, nəticədə daha çox qazanc əldə edirlər. 

Onu da qeyd edək ki, cari mövsüm Tovuzda kartof əkininə ötən illərlə müqayisədə bir qədər tez başlanılıb. Bunun səbəbi mövcud su qıtlığı ilə əlaqədardır. Rayonda, əsasən, təbii suvarma mənbələrindən olan Zəyəm çayında yay aylarında suyun azalacağı ehtimalı fermerləri bir qədər tələsməyə məcbur edib.

Ötən illərdən fərqli olaraq builki əkinlərin 90 faizinin kənd təsərrüfatı texnikasının köməyi ilə aparılmsı nəzərdə tutulur. Texnika hesabına məhsulun maya dəyəri aşağı düşür. Hazırda rayonda elə iri təsərrüfatlar var ki, onlar kartofun əkilməsindən tutmuş çıxarılmasınadək bütün işləri texnika ilə həyata keçirirlər. 

Ümumiyyətlə, Tovuzda kartofçuluğa maraq çoxdur. Rayon sakinləri iqtisadi cəhətdən gəlirli sahəyə çevrilən bu məhsulun istehsalını ildən-ilə artırmaq üçün var qüvvələrini əsirgəmirlər. Əldə etdikləri gəlir isə onları daha yüksək göstəricilərə nail olmağa həvəsləndirir. 

© "Azərbaycan"