(®) Naxçıvan Universitetinin dəvəti ilə UNEC-in rektoru i.e.d., prof. Ədalət Muradovun rəhbərlik etdiyi nümayəndə heyəti bu gün Naxçıvan şəhərinə səfər ediblər. 

"Naxçıvan" Universitetinin mövcud infrastrukturu ilə yaxından tanış olan rektor Ədalət Muradov Universitetin təhsil modelini yüksək qiymətləndirib. O, təhsildə müasir texnologiyaların tətbiqini tədrisin keyfiyyətinin yüksəldilməsində önəmli amil adlandırıb.

Tanışlıqdan sonra universitetin konfrans zalında iki ali təhsil ocağı arasında əməkdaşlıq müqaviləsinin imzalanma mərasimi keçirilib. Tədbirdə UNEC-in rektoru, prof. Ədalət Muradov və nümayəndə heyəti, “Naxçıvan" Universitetinin rektoru, dos. Anar Kazımov, universitetin müəllim-tələbə heyəti iştirak edib.

"Naxçıvan" Universitetinin rektoru, Anar Kazımov bildirib ki, iki universitet arasında bağlanan müqavilə hər iki ali təhsil müəssisəsi arasında əlaqələrin möhkəmlənməsinə əlverişli şərait yaradacaq və elmi layihələrin həyata keçirilməsinə təkan verəcək. 

Rektor rəhbərlik etdiyi ali təhsil müəssisəsinin fəaliyyəti, buradakı təhsil, tədris prosesi, kadr hazırlığı istiqamətləri və mövcud ixtisaslar barədə məlumat verərək, tədrisin keyfiyyətinin artırılması, elmi fəaliyyətin səmərəliliyinin yüksəldilməsi və universitet idarəçiliyində innovativ metodların tətbiq edilməsi istiqamətində islahatların aparıldığını bildirib. Dünya səviyyəli universitet olmaq yolunda sürətlə irəliləyən UNEC-lə əməkdaşlığın "Naxçıvan" Universiteti üçün mühüm faydalar verəcəyinə əminliyini bildirən A. Kazımov tərəfdaş kimi hərtərəfli qarşılıqlı əməkdaşlığın reallaşdırılması üçün bütün imkanlardan istifadə ediləcəyini bildirib.

Rektor, həmçinin universitetlər arasında elm, təhsil sahəsində həyata keçirilən layihələrin, tələbə-müəllim mübadiləsinin vacibliyini qeyd edib, əlaqələrin daha da intensivləşməsinə ehtiyac olduğunu vurğulayıb.

Ədalət Muradov isə çıxışında UNEC-in fəaliyyət istiqamətlərində regional universitetlərlə əməkdaşlığın prioritet olaraq müəyyənləşdirildiyini qeyd edib. UNEC-in Lənkəran Dövlət Universiteti (LDU), Gəncə Dövlət Universiteti və Mingəçevir Dövlət Universiteti ilə əməkdaşlıq etdiyini deyən rektor, əməkdaşlıq etdiyi universitetlərlə ikili diplom proqramı barədə razılaşmanın da əldə olunduğunu vurğulayıb. Ə.Muradov UNEC-in regional universitetlərlə əməkdaşlıqda dünya praktikasında qəbul olunan yeni yanaşma ilə çıxış etdiyini, ikili diplom proqramının bu əməkdaşlığın əsas hədəfi olduğunu bildirib. UNEC ilə "Naxçıvan" Universiteti arasında əməkdaşlığın uğurlu olacağını bildirən prof. Ə.Muradov, bu ali təhsil müəssisəsinin ölkənin təhsil sistemində və regional universitetlər arasında qısa müddətdə qabaqcıl universitetə çevriləcəyindən əminliyini ifadə edib.

Qeyd edək ki, "Naxçıvan" Universiteti ilə UNEC arasında imzalanan əməkdaşlıq müqaviləsinə əsasən universitetlər arasında müəllim və tələbə mübadiləsinin aparılması, birgə ikili diplom proqramlarının reallaşdırılması, elmi-tədqiqat işlərinin görülməsi və elmi konfransların təşkili nəzərdə tutulur. Distant təhsil, elektron universitet modeli, informasiya texnologiyaları sahəsində əməkdaşlığın genişləndirilməsi, universitetlər arasında anti-plaqiat sahəsində təcrübə mübadiləsinin aparılması da müqavilədə öz əksini tapıb.

İmza mərasimindən sonra qonaqlar tələbələrin ifasında maraqlı şeir və musiqi nömrələrini izləyiblər.