Azərbaycanın ilk və ən böyük onlayn ödəmələr şirkəti QoldenPey ASC, 2022-ci ilin yekunları üzrə beynəlxalq standartlara uyğun hazırlanmış maliyyə hesabatlarını ictimaiyyətə açıqlayıb.

GoldenPay şirkətinin idarə heyətinin sədri Naina Mehdiyevanın Marja-ya verdiyi məlumata əsasən, bu il fəaliyyətinin 16-cı ilində olan şirkətin göstəricilərində əvvəlki il ilə müqayisədə xeyli artım müşahidə olunub.

Belə ki, şirkətin 2022-ci il üzrə ümumi dövriyyəsi 624 milyon 49 min manat olmuşdur ki, buda əvvəlki ilin analoji dövrü ilə müqayisədə 26% çoxdur (2021-ci ildə 494 milyon 932 min manat).

2022-ci ildə Şirkətin gəlirləri 11 milyon 155 min manat olmuşdur ki, buda əvvəlki ilin analoji dövrü ilə müqayisədə 33% çoxdur (2021-ci ildə 8 milyon 397 min manat).

“QoldenPey” ASC 2022-ci ili 2 milyon 147 min manat xalis mənfəətlə başa vurub. 2021-ci ildə şirkətin mənfəəti 1 milyon 410 min manat təşkil etmişdi. Beləliklə, illik müqayisədə şirkətin xalis mənfəəti 52% artıb.

2022-ci il sonu etibarilə “QoldenPey” ASC-nin cəmi aktivləri 6 milyon 625 min manat təşkil etmişdir. Bu göstərici əvvəlki ilin (2021-ci il 4 milyon 158 min manat) analoji dövrü ilə müqayisədə 59% artmışdır.

2022-ci il sonu etibarilə Şirkətin cəmi kapitalı (xalis aktivlər) 4 milyon 615 min manat təşkil etmişdir. Bu göstərici əvvəlki ilin (2021: 2 milyon 467 min manat) analoji dövrü ilə müqayisədə 87% çoxdur.

Bu artımı həmdə Hesab.az onlayn xidmətlər platforması üzrə də müşahidə etmək mümkündür. Belə ki, platformanın 2021-ci ildə 688 min qeydiyyatlı istifadəçi sayı olduğu halda, 2022-ci ildə bu rəqəm 729 minə kimi yüksəlmişdir. Bu da platformanın qeydiyyatlı istifadəçi sayında bir il ərzində 6% artım olduğunu göstərir. Hazırda isə, platformada qeydiyyatlı istifadəçi sayı 740 mindən çoxdur.

14 Aprel tarixində yaradılışının 12-ci ilini qeyd edən Hesab.az, bu artıma funksional yenilikləri, ödəmə xidmətlərinin genişləndirilməsi, göstərdiyi xidmət keyfiyyəti ilə müştəri məmnuniyyətinin təmin edilməsi və həmçinin də həyata keçirilən müxtəlif kampaniyaları ilə nail olmuşdur.

 Naina Mehdiyeva qeyd edib ki, 2023-ci ildə şirkətin göstəricilərinin daha da artırılması, yeni məhsul və xidmətlərin təqdim olunması və bazardakı lider mövqeyinin saxlanılması nəzərdə tutulur.

Azərbaycanda ən böyük onlayn ödəmələr şirkəti GoldenPay 2007-ci ilin iyul ayında yaradılıb. Şirkət texniki işlərin yekunlaşması, “Visa” və “MasterCard” beynəlxalq ödəniş sistemlərindən müvafiq sertifikatların alınmasından sonra 2008-ci ilin dekabr ayında fəaliyyətə başlayıb.

2011-ci ilin aprel ayında GoldenPay şirkəti Hesab.az - Azərbaycanın ən böyük onlayn xidmətlər platformasını yaradıb. Hesab.az-da müxtəlif kommunal, stasionar və mobil rabitə, internet, bank kreditlərinin ödənişi, onlayn sığorta, kinoteatra bilet və sair xidmətlərin alışı /ödənişi mümkündür.