31 mart 2023-cü il tarixinə fəaliyyətdə olan bankların cəmi aktivləri 44,843.2 mln. manat, cəmi öhdəlikləri 38,993.9 mln. manat, balans kapitalı isə 5,849.3 mln. manat olmuşdur.

Marja.az xəbər verir ki, bu, Mərkəzi Bankın 2023-cü ilin mart ayı üzrə Statistik Bülletenində bildirilir.

Qeyd edilib ki, Mart ayında bankların kredit portfeli 1.4% və ya 281.2 mln. manat artaraq 20,038.6 mln. manat olmuşdur.

Kredit portfelinin strukturu: ı) biznes kreditləri – 54.8% (10,971.4 mln. manat), ıı) istehlak kreditləri – 29.7% (5,942.4 mln. manat) və ııı) ipoteka kreditləri – 15.6% (3,124.8 mln. manat).

Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 0.9 faiz bəndi azalaraq 2.9% təşkil etmişdir.

Öhdəliklərin strukturunda depozit portfeli üstünlük təşkil edir (cəmi öhdəliklərin 81.9%-i və ya 31,933.2 mln. manat). Depozit portfelinin 63.3%-i (20,213.7 mln. manat) hüquqi şəxslərin, 36.7%-i (11,719.5 mln. manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.

Hesabat ayında bankların əmanət portfeli 0.6% və ya 65.5 mln. manat artmışdır. Əmanət portfelinin 53.9%-i (6,311.4 mln. manat) müddətli əmanətlərdən ibarətdir. Hüquqi şəxslərin tələbli depozitləri 17,319.7 mln. manat olmaqla, hüquqi şəxslərin cəmi depozit portfelinin 85.7%-ni təşkil etmişdir.

Fiziki şəxslərin əmanətlərinin dollarlaşması mart ayında ilin əvvəlinə nəzərən 1 faiz bəndi, əvvəlki ilin müvafiq dövrünə nəzərən isə 4.1 faiz bəndi azalaraq 38.2% təşkil etmişdir.

2023-cü ilin yanvar-mart aylarında banklar 267.9 mln. manat xalis mənfəət, 392 mln. manat məbləğində əməliyyat mənfəəti əldə etmişlər. 2022-ci ilin I rübü ilə müqayisədə bankların xalis və əməliyyat mənfəəti müvafiq olaraq 54% və 42% artmışdır.

Cari ilin mart ayında manatla geniş mənada pul kütləsi (M2) ilin əvvəlinə nəzərən 0.4% artaraq 29,694 mln. manat təşkil etmişdir.

Bank sektorunun xarici öhdəlikləri ilin əvvəlinə nəzərən 390.1 mln. manat artaraq 2,152.1 mln. manat təşkil etmişdir. Xarici öhdəliklərdəki qeyd olunan dəyişiklik əsasən qeyri-rezident hüquqi şəxslərin qısamüddətli depozitlərinin həcmindəki artım ilə əlaqədardır.

31 mart 2023-cü il tarixinə fəaliyyət göstərən 25 bankın filiallarının sayı 491, şöbələrinin sayı 94, ATM-lərin sayı isə 2,996 olmuşdur.hesabat ayında da bank sektorunda çalışanların sayında artım trendi davam etmişdir. Mart ayında bank əməkdaşlarının sayı 0.5% və ya 124 nəfər artaraq 23,164 nəfər təşkil etmişdir.