Aktivlərin həcmi üzrə Azərbaycanda ikinci böyük bank olan "PAŞA Bank" ASC 2023-cü ilin 1-ci rübü (yanvar-mart) üzrə maliyyə göstəricilərini açıqlayıb.

Marja.az xəbər verir ki, "PAŞA Bank" 2023-cü ilin 1-ci rübünü 42 milyon 231 min manat xalis mənfəət ilə başa vurub. Bank 2022-ci ilin 1-ci rübünü 38 milyon 326 min manat xalis mənfəət ilə bağlamışdı. Beləliklə, "PAŞA Bank"ın xalis mənfəəti 2022-ci ilin 1-ci rübü ilə müqayisədə 2023-cü ilin 1-ci rübündə 10,2% və ya 3 milyon 905 min manat artıb.

GƏLİRLƏRİ ARTIB 

2023-cü ilin 1-ci rübündə "PAŞA Bank"ın cəmi əməliyyat gəlirləri (faiz və qeyri-faiz gəlirləri) 130 milyon 494 min manat təşkil edib ki, bu da 2022-ci ilin 1-ci rübü ilə müqayisədə 33,4% və ya 32 milyon 690 min manat çoxdur. 2022-ci ilin 1-ci rübündə Bankın cəmi əməliyyat gəlirləri 97 milyon 804 min manat təşkil etmişdi. 

2023-cü ilin 1-ci rübündə "PAŞA Bank"ın cəmi əməliyyat xərcləri (faiz və qeyri-faiz xərcləri) 65 milyon 88 min manat təşkil edib ki, bu da 2022-ci ilin 1-ci rübü ilə müqayisədə 19,9% və ya 10 milyon 809 manat çoxdur. 2022-ci ilin 1-ci rübündə Bankın cəmi əməliyyat xərcləri 54 milyon 279 min manat təşkil etmişdi.

2022-ci ilin 1-ci rübündə "PAŞA Bank"ın əməliyyat mənfəəti 43 milyon 260 min manat ikən, 2023-cü ilin 1-ci rübündə 60 milyon 189 min manata yüksəlib (16 milyon 929 min manat və ya 39% artıb). 

RÜBLÜK FAİZ GƏLİRLƏRİ 100 MİLYON MANATDAN ÇOX OLUB

2022-ci ilin 1-ci rübü ilə müqayisədə 2023-cü ilin 1-ci rübündə "PAŞA Bank"ın faiz gəlirləri 29 milyon 300 min manat və ya 41% artaraq 100 milyon 795 min manata, qeyri-faiz gəlirləri isə 3 milyon 390 min manat və ya 12,9% artaraq 29 milyon 699 min manat təşkil edib. 

AKTİVLƏRİ 173 MİLYON MANATDAN ÇOX ARTIB

2022-ci ilin sonu ilə müqayisədə 2023-cü ilin ilk rübündə "PAŞA Bank"ın cəmi aktivləri 173 milyon 222 min manat artaraq 31 mart 2023-cü il tarixində 8 milyard 693 milyon 36 min manata, o cümlədən kredit portfeli (müştərilərə verilən kreditlər) 25 milyon 727 min manat artaraq 31 mart 2023-cü il tarixində 2 milyard 753 milyon 791 min manata çatıb. 

DEPOZİTLƏR 100 MİLYON MANATDAN ÇOX ARTIB

2022-ci ilin sonu ilə müqayisədə 2023-cü ilin ilk rübündə "PAŞA Bank"da depozitlər 100 milyon 964 min manat artaraq 31 mart 2023-cü il tarixində 7 milyard 105 milyon 283 min manata yüksəlib.

31 mart 2023-cü il tarixində "PAŞA Bank" 550 milyon 710 min manat məcmu kapitala malik olub.