Xarici banklar Türkiyədəki seçkilər (prezident və parlament) və seçkidən sonrakı dövr üzrə təhlilərini və USD/TL (Dollar/Türk Lirəsi) proqnozlarını açıqlayırlar.

Marja.az xəbər verir ki, qlobal bank Morgan Stanley kimi, Dünyanın ən böyük bank və maliyyə xidmətləri institutlarından biri olan HSBC də seçkilərin nəticəsindən asılı olmayaraq türk lirəsinin zəifləməsinin mümkün olduğuna diqqət çəkib.

HSBC-nin strateqləri tərəfindən yazılan hesabatda qeyd edilib ki, pisləşən təməllər və TL-nin xeyli müddətdir süni yollarla sabit saxlanıldığı əlamətləri məzənnədə daha geniş korreksiyaya səbəb ola bilər.

Bu qiymətləndirməsi ilə Bank 2023-cü ilin sonu üçün dollar/Türk Lirəsi proqnozunu 21-dən 24-ə yüksəldib.

Hesabatda, prezident və parlament seçkilərinin iqtisadiyyat və pul siyasətində türk lirəsinin orta və uzunmüddətli perspektivində təsirli ola biləcək dəyişikliklər yarada biləcəyi vurğulanıb.

Türk lirəsinin tsiklik və struktur zəifliklərinin göz önündə olduğuna diqqət çəkən qlobal bank, bir çox əvvəlki hesabatlarda da vurğulandığı kimi, yüksək mənfi real faiz dərəcələri, yüksək cari əməliyyat kəsiri, nizamlı kapital axınının olmaması, aşağı valyuta ehtiyatları və bunlar ilə bağlı risklərin olduğunu bildirib. Türk lirəsi üçün əsas problemlər lirələşdirmə siyasətinin davamlılığıdır.

HSBC 2023-cü ilin ikinci rübü üçün dollar/TL üzrə proqnozunu 19,5 lirədən 20 lirəyə yüksəldib. Üçüncü rübün sonu üçün Bankın dollar/TL gözləntisi 20-dən 23-ə yüksəlib. İl sonu USD/TL proqnozu isə 21-dən 24-ə qaldırılıb.

Türkiyədə ötən ilin avqust ayından etibarən inflyasiyanın əhəmiyyətli dərəcədə artmasına baxmayaraq, nominal effektiv məzənnənin 6,5 faiz azalmasının məzənnə ilə inflyasiya arasındakı dinamikada güclü fərqlərə işarə etdiyi vurğulanıb.

Hesabatda, “TL-nin cari ədalətli dəyər diapazonundan 30-45% kənara çıxdığını fərz etsək, dollar/TL 24-27 aralığına qalxmalı olacaq. TL-nin zəif təməllərini nəzərə alaraq, dollar/TL il sonu proqnozumuzu 21-dən 24-ə düzəldirik", - bildirilir.

Həmçinin oxu

"Türkiyədə seçkidə kimin qalib gəlməsindən asılı olmayaraq, ilk mərhələdə dollar bahalaşacaq, lirə ucuzlaşacaq"

Zəlzələdən sonra Türk Lirəsi (TL) 2,2 faiz dəyər itirib

Qeyd edək ki, seçkilər yaxınlaşdıqca TL-nin dəyərdən düşməsi zəlzələdən əvvəlki dövrlə müqayisədə gündəlik olaraq bir qədər sürətlənib. Fevralın 6-da baş verən zəlzələdən sonra iki ayda lirə 2,2 faiz dəyər itirib.