“Hell Energy” şirkəti Azərbaycanda alüminium içki qutularının istehsalı və doldurulması üzrə layihəni həyata keçirəcək.

“Azərbaycan İnvestisiya Şirkəti” ASC və Macarıstanın “Hell Energy” şirkəti arasında əməkdaşlıq müqaviləsi imzalanıb. 

Marja xəbər verir ki, sənədə əsasən, Azərbaycanda alüminium içki qutularının istehsalı və doldurulması layihəsi həyata keçiriləcək. Layihə üzrə Ələt Azad İqtisadi Zonasında inşası nəzərdə tutulan zavodda ilkin olaraq illik 300-400 milyon ədəd alüminium içki qutularının istehsalı və doldurulması nəzərdə tutulub.

Layihənin həyata keçirilməsi ölkəyə xarici investisiyaların cəlb edilməsinə, texnoloji baxımdan qabaqcıl təcrübənin əldə olunmasına, idxalın əvəz edilməsinə və hazır məhsulun digər ölkələrə ixrac potensialının artırılmasına töhfə verəcəkdir.

Qeyd edək ki, Macarıstanın 2006-cı ildə əsası qoyulmuş “Hell Energy” şirkətinin məhsulları dünyanın 50-dən çox ölkəsində istehlakçılara təklif olunur. Şirkət içki qutularının istehsalı və doldurulması üzrə də müasir zavodlara malikdir.

XXX

"Azərbaycan və Macarıstan arasında iqtisadi-ticarət əlaqələrinin gücləndirilməsi davam edir".

Marja.az-ın məlumatına görə, Azərbaycanın İqtisadiyyat naziri Mikayıl Cabbarov bildirib ki, dövlətə məxsus "Azərbaycan İnvestisiya Şirkəti" ASC və Macarıstanın "Hell Energy" şirkəti arasında investisiya müqaviləsi imzalanıb.

"İmzalanmış investisiya müqaviləsi ölkələrimizin biznes dairələrinin səmərəli əməkdaşlığı istiqamətində əhəmiyyətli addımdır",- nazir bildirib.

"Hell Enerji" Macarıstanın enerji içkiləri markasıdır.

HELL ENERGY dünyada sürətlə böyüyən brendlərindən biridir. 100 faiz Macarıstan enerji içkisi brendi 2006-cı ildə yaradılmış və 2010-cu ilə qədər Macarıstanda bazar lideri olmuşdur. Hazırda brendin məhsulları 50-dən çox ölkəyə ixrac olunur.  

HELL ENERGY-nin uğurunun "onun keyfiyyəti, münasib qiyməti, geniş əlçatanlığı və dünya səviyyəli marketinq kommunikasiyası fəaliyyəti ilə" bağlı olduğu bildirilir. Şirkət enerji içkiləri sektorunda mühüm oyunçudur, özünün modern doldurma zavoduna və içki taraları zavoduna sahibdir.

"Azərbaycan İnvestisiya Şirkəti" ASC Prezidentin müvafiq Sərəncamı ilə 2006-cı ildə yaradılıb. AİŞ-in bütün payları Azərbaycan dövlətinə məxsusdur. Şirkət Müşahidə Şurası tərəfindən idarə edilir. AİŞ-in məqsədi Azərbaycanın qeyri-neft sektoruna kapital investisiyalarının yatırılmasıdır. Şirkətin nizamnamə kapitalı 267 milyon manat təşkil edir.