(®) "MKT İK” MMC tərəfindən “Fermerlərlə görüş: Keçən ilin yekun qiymətləndirilməsi və yeni mövsümə hazırlıq”mövzusunda martın 9-da Ağcabədi şəhərində yığıncaq keçirilib.

Tədbir başlamazdan öncə şirkət əməkdaşları və gələn qonaqlar ümummilli lider Heydər Əliyevin abidəsini ziyarət edib, önünə çiçək dəstələri düzmüşdür.

Ağcabədi rayon icra hakimiyyətinin başçısı Rafil Hüseynov, “MKT İK” MMC-nin məsul əməkdaşları, 15 rayondan 200-ə qədər fermer, aidiyyatı idarə və təşkilatların nümayəndələri Ağcabədi rayon Mədəniyyət Mərkəzində bir araya gəlib.

Tədbiri çıxış nitqi ilə açan icra başçısı qonaqları və iştirakçıları salamlayıb, qarşıdan gələn Novruz bayramı münasibəti ilə onları təbrik edib. O, pambıqçılığın inkişafı istiqamətində rayonda görülən işlər haqqında məlumat verib.

Sonra, “MKT İK” MMC, “Mingəçevir Texstil Parkı” və “GİLTEX” MMC-in daxil olduğu “GP Cotton Holdings”-in rəhbər şəxləri pambıqçılıqla bağlı həyata keçirilən tədbirlər və qarşıda duran hədəflərdən söz açıb.

Hər üç şirkət haqqında ətraflı məlumat verildikdən sonra sadəcə “MKT İK” MMC-nin 11 emal zavodu, 300-dən çox aqronom və nümayəndəsi olduğunu, 10 minədək fermerlə çalışdığını vurğulanıb. O da qeyd olunub ki, şirkətin fəaliyyət göstərdiyi rayonlarda son illərdə orta hesabla 45 min hektarda pambıq yetişdirilir və məhsuldarlıq səviyyəsinə görə 70 ölkə arasında 7-ci yerdə qərarlaşıb. Natiqlər eyni zamanda pambıqçılıq sahəsində istifadə olunmuş məhsula görə subsidiya siyasətinin tətbiqindən danışıb, fermerlərin texnika, maşın və gübrə ilə təminatı sahəsində irimiqyaslı tədbirlərin həyata keçirildiyini, pambığın becərilməsində intensiv texnologiyalardan istifadə etməklə məhsuldarlığı artırmağın vacibliyini bildirib.

Sonra Biznesin İnkişafı Depertamentinin rəhbəri Hikmət Hüseynov çıxış edərək fermerlər arasında sorğuların keçirilməsi, xidmət və malların qiyməti barədə, aqro-texniki tədbirlərin təkmilləşdirilməsindən və yeniliklərin tətbiqindən danışıb.

Daha sonra çıxış edənlər fermerlərə laborator xidmətinin göstərilməsi, lifi yüksək keyfiyyətli olan “Barbadenza” pambıq növünün sınaq əkininə başlanılmasından, şoran  torpaqlarda məhsuldarlığın artırılması və bu kimi digər mövzulardan söhbət açıblar.

Daha sonra fermerləri maraqlandıran suallar cavablandırılıb və onların təklifləri dinlənilib.

Yekunda qabaqcıl təsərrüfatçılar şirkət tərəfindən mükafatlandırılıb.

Əlavə olaraq qeyd etmək istərdik ki, "MKT İstehsalat Kommersiya" MMC 25 ildən çoxdur ki, ölkəmizdə pambıq və pambıq məhsulları istehsalı və ixracını həyata keçirir.

2022-ci il üzrə hazırlanan qeyri-dövlət və qeyri-neft ixracatçı subyektlərin reytinqində “MKT İK” MMC birinci yerdə qərarlaşmışdır. Hal-hazırda müəssisədə işçi sayı 5000 nəfərə yaxındır və regionlarda 23 filialı fəaliyyət göstərməkdədir.