Bu gün Bakıda Vergi və Mühasibatlıq Zirvəsi öz işinə başlayıb.

Marja.az-ın məlumatına görə, Zirvədə mühasiblərin aşağı əməkhaqqı problemi də müzakirə edilib.

Zirvədə “Ziddiyyətlərin harmoniyası - rəhbər və mühasib” panelinin moderatoru Bakı Hesabat Mərkəzinin rəhbəri Mehdi Babayev bildirib ki, Azərbaycanda mühasiblərin əməkhaqqısı aşağıdır: "Mən istəyirəm ki, bəzi gizli məqamları gizli saxalamayaq. Bir neçə misal çəkəcəm ki, onlar ziddiyyətlər yaradır. Söhbət mühasib ilə rəhbər arasında ziddiyyətlərdən gedir. Hamımız qəbul edək ki, mühasibin əməkhaqqısı aşağıdır. Məncə buna heç kim etiraz etməz. Biz buna dözmürük. Aşağı əməkhaqqı ziddiyyəti yaradan bir nömrəli səbəbdir".

Onun bu açıqlaması alqışlar ilə qarşılanıb.

Mehdi Babayev əlavə edib ki, bir çox müəssisələrdə mühasiblərin səlahiyyətlər azdır və ya əllərindən alınır, onlara imkan verilmir: "Gəlin bunu da etiraf edək. Hətta elə məqamlar var ki, mühasibi qanunsuzluqlara təhrik edirlər. Özü pis vəziyyətdə qalır. Çox vaxt rəhbərlik mühasibin işini də ciddi hesab etmir. Belə rəhbərlərə də rast gəlirik. Bəzi rəhbərlər köhnə biznes vərdişləri ilə işləyir, yenə də yayınmalara çalışır, bunlar da mühasiblərin doğru işləməsinə problemlər yaradır və mühasib ilə rəhbər arasında ziddiyyətin yaranmasına səbəb olur. Bir çox halda da rəhbərlər mühasibi özündən asılı vəziyyətə salmaq istəyir. Rəhbərlər bilməlidirlər ki, mühasiblər onlardan asılı vəziyyətə düşməməlidir. Vergi qanunvericiliyinə son vaxtlar edilən çoxlu dəyişikliklər, rəqəmsallaşmaya keçid də rəhbər ilə mühasib arasında zidiyyət yaradan məsələlərdən biridir".

Bakı Hesabat Mərkəzinin rəhbəri Mehdi Babayev

Azərbaycan İnvestisiya Holdinqinin (AİH) Mühasibat Uçotu və Maliyyə Hesabatlılığı şöbəsinin müdiri – baş mühasibi Vüqar İbrahimov bildirib ki, bəzi sahələrdə mühasiblər eyni iş yükü olan digər işçilərdən 2 dəfə az maaş alır:

"Çox təəssüf edirəm ki, mühasib ilə eyni iş yükündə olan əməkdaşların, mütəxəssislərin əməkhaqları mühasibin əməkhaqqından daha çox olur. Həta 30%, 50%, bəzi sahələrdə isə 2 dəfə yüksək olur. Bu da təbii ki, ilk növbədə mühasibin ruhdan düşməsinə və sahibkardan incik qalmasına səbəb olur. Belə olan halda mühasibdən keyfiyyətli işin görülməsini də görə bilmərik. Bu da ziddiyyət yaradan, konfliktə gətirən səbəblərdən biridir".

Digər bir məsələ ünsiyyət problemidir. Bəzi rəhbərlər mühasib ilə ünsiyyətdən qaçır. Mühasibin fikirləri ciddi hesab edilmir. Rəhbərlər daha çox biznesin gəlir gətirən bölməsinin rəhbərlərinə üstünlük verir. Mən tövsiyə edirəm ki, rəhbərlər üstünlüyü bərabər bölsünlər". 

Həmçinin oxu

Vergi və Mühasibatlıq Zirvəsini izləyə bilərsiniz - VİDEO