Azərbaycanda islam bankçılığının tətbiqi üçün ilk növbədə qanunvericilikdə müəyyən dəyişikliklərin edilməsinə ehtiyac var.

Bu qənaətə “İqtisadi Resursların Öyrənilməsi” İctimai Birliyinin “Azərbaycanda alternativ maliyyə və islam bankçılığı üzrə ehtiyacların qiymətləndirilməsi" layihəsi çərçivəsində keçirdiyi sorğudan sonra gəlinib.

Sorğu İqtisadiyyat Nazirliyi yanında Kiçik və Orta Biznesin İnkişafı Agentliyinin elan etdiyi tender əsasında keçirilib və hesabat hazırlanıb. Sənəddə deyilir ki, "Banklar haqqında" qanuna "İslam banklarının fəaliyyətlərinin tənzimlənməsi" adlı yeni bölmə əlavə edilməlidir. Bu dəyişiklik fəaliyyətdə olan bankalara İslam bankçılığı məhsulları təqdim etməyə imkan verər.

Bundan başqa, hesabata əsasən, dəyişiklər özündə islam banklarına dair tələbləri, islam maliyyələşdirilməsi üzrə fəaliyyət göstərəcək Şuranın (Şəriət Şurasının) formalaşması prinsiplərini, hüquq və öhdəlikləri, islam banklarının fəaliyyət çərçivəsini, məhsul və xidmətlərinin çeşidini, xüsusiyyətlərini, ənənəvi bankın islam bankına çevrilməsi mexanizmlərini ehtiva etməlidir.

Həmçinin sorğu iştirakçıları təklif edib ki, islam bankçılığının ilkin dövrlərində əhalinin əmanətlərini bu maliyyə institutlarına cəlb etmək üçün dividend gəlirləri 5 il müddətinə vergidən azad edilsin, islam banklarının sərbəst fəaliyyəti üçün birgə müəssisələrin təşkili, birgə fəaliyyət üzrə öhdəliklərin formalaşması, payda iştirak və əldə olunan dividendlər üzrə gəlirlərin vergiyə cəlbi istiqamətində islahatlar aparılsın.

Hesabatda islam bankçılığı sahəsində peşəkar kadrların hazırlanması istiqamətində də bir sıra təkliflər var. Həmin təkliflər aşağıdakılardır:

- Azərbaycanda maliyyə və bank işi ixtisasları üzrə kadr hazırlığını həyata keçirən ali məktəblərin bakalavr və magistr pillələrində islam bankçılığı üzrə dərsləri seçmə və yaxud məcburi fənn kimi kurikuluma salmaq;

- islam bankçılığı üzrə beynəlxalq sertifikat proqramlarının alınması üçün kadrların əlçatanlığını asanlaşdırmaq;

- yerli ictimai birliklər, sahibkar assosiasiyaları vasitəsilə İslam bankçılığı üzrə təlimlər təşkil etmək.

© Report