ABŞ prezidenti Co Bayden Dünya Bankının rəhbəri (Prezidenti) vəzifəsinə Ajay Banganın namizədliyini irəli sürdüyünü açıqlayıb.

Marja Ağ Evin yaydığı məlumata istinadən xəbər verir ki, Bayden, 30 ildən çox təcrübəyə malik Ajay Banganın Dünya Bankına rəhbərlik etmək üçün uyğun olunduğunu bildirib.

Bayden, Banganın iş yerləri yaradan və inkişaf etməkdə olan iqtisadiyyatlara sərmayə gətirən uğurlu qlobal şirkətlərin qurulması və idarə edilməsində təcrübəsinə istinad edərək, dünya miqyasında qlobal liderlər ilə tərəfdaşlıqda sübut edilmiş təcrübəyə malik olduğunu və dərin dəyişikliklər zamanı təşkilatlara rəhbərlik etdiyini bildirib.

Bayden deyib: “Hindistanda böyümüş Ajay, inkişaf etməkdə olan ölkələrin üzləşdiyi imkanlar və problemlər və Dünya Bankının yoxsulluğu azaltmaq və rifahı genişləndirmək üçün iddialı gündəmini necə yerinə yetirə biləcəyi barədə unikal perspektivə malikdir.”

Ajay Banga Hindistanda böyüyüb. O hazırda sərmayə şirkəti "General Atlantic"də vitse-prezident vəzifəsində çalışır. Ajay Banga "Mastercard" ödəniş xidmətinin rəhbəri vəzifəsində də çalışıb.

ABŞ-ın maliyyə naziri Janet Yellen, Ajay Banganın Dünya Bankının rəhbəri vəzifəsinə namizədliyi ilə bağlı verdiyi açıqlamada Banqanın düzgün liderlik və idarəetmə bacarıqlarına, inkişaf etməkdə olan bazarlarda yaşamaq və işləmək təcrübəsinə malik olduğunu bildirib.  

Dünya Bankının prezidenti vəzifəsinə namizədlər martın 29-dək təqdim edilməlidir.

Tarixən, Dünya Bankına onun ən böyük səhmdarı olan ABŞ-dan, Beynəlxalq Valyuta Fonduna (BVF) isə ABŞ-dan olan şəxs rəhbərlik edir.

Keçən həftə Dünya Bankının keçmiş rəhbəri David Malpass təəccüblü şəkildə istefa verdiyini açıqlayıb. Dünya Bankı çərşənbə günü elan edib ki, Malpass iyunun sonunda vəzifəsini tərk edəcək. İstefa Dünya Bankı rəhbərinin səlahiyyət müddətinin adi başa çatmasına təxminən bir il qalmış baş verir. Malpass iqlim dəyişikliyi ilə bağlı açıqlamalarına görə ağır tənqid edilib.

Malpass 2019-cu ildə ABŞ-ın keçmiş prezidenti Donald Trampın təklifi ilə onun dövründə vəzifəyə gəlib. O, beş il müddətinə təyin edilib. Dünya Bankı yoxsul ölkələrin iqtisadiyyatını gücləndirmək və orada yoxsulluğu azaltmaq məqsədi ilə kredit verir.