Neft bir qədər ucuzlaşıb. Marja xəbər verir ki, ABŞ-da faiz dərəcələrinin daha da artacağı ilə bağlı narahatlıqlar və güclü dollar Çində tələbin potensial bərpası ilə bağlı nikbinliyin üzərindən xətt çəkir.

ABŞ-da qiymət indeksləri (inflyasiya göstəricisi), dünyanın ən böyük iqtisadiyyatında inflyasiyanın çox güman ki, inadkar qalacağını göstərir. 

ABŞ Mərkəzi Bankının (FED) rəsmiləri gələcək aylarda faizlərin daha da artırılacağına işarə ediblər. Faizlərin daha da yüksəldilməsi bu il iqtisadi artıma maneə törədə və xam neftə tələbi azalda bilər.

Bakı vaxtı ilə 08:00-a olan məlumata görə, Brent neftinin fyuçersləri 0,8% azalaraq barreli 84,48 dollara, Qərbi Texas neftinin fyuçersləri isə 0,7% geriləyərək bareli 77,97 dollara düşüb. Hər iki müqavilənin bu həftə 1.5% ilə 2% arasında dəyər itirilməsi nəzərdə tutulur.

FED rəsmiləri James Bullard və Loretta Mesterin mərkəzi bankın daha çox faiz artıracağı barədə açıqlamaları xam neft qiymətlərinə mənfi təsir edən dolların bahalaşmasına səbəb olub. Dolların möhkəmlənməsi xam nefti beynəlxalq alıcılar üçün bahalaşdırır və qlobal neft tələbini azaldır.

Neft qiymətləri bu həftənin əvvəlində Bayden Administrasiyasının Strateji Neft Ehtiyatından 26 milyon barrel xam neft satmağı planlaşdırması ilə də aşağı düşüb. Bu, ABŞ-ın xam neft ehtiyatlarında gözləniləndən əhəmiyyətli dərəcədə böyük artımı göstərən məlumatlar ilə bəraabər, yaxın perspektivdə ABŞ-da potensial tədarük bolluğuna işarə edir.

Bazarlarda Çin tələbinin bərpası ilə bağlı optimizm də möcuddur. Həm Neft İxrac Edən Ölkələr Təşkilatı, həm də Beynəlxalq Enerji Agentliyi 2023-cü il üçün tələb proqnozlarını yüksəldiblər. Proqnozlara görə, Çində bərpa bu il neft tələbinin 50%-dən çoxunu təmin edəcək.

Çin, üç illik karantin məhdudiyyətlərini ləğv edib və iqtisadi artımı dəstəkləyir.

Lakin Çindən gələn iqtisadi məlumatlar ölkədə bərpanın çox da güclü olmadığını göstərib. Neft "buğaları" indi dünyanın ən böyük neft idxalçısında iqtisadi canlanmanın daha güclü əlamətlərini gözləyir.