29 dekabr 2022-ci il tarixlərində Bakı Fond Birjası vasitəsilə yerləşdirilmiş "Unibank Kommersiya Bankı" ASC-nin 6 milyon 800 min manatlıq yeni səhmlərini əldə etmiş 7 investordan 3-nün adı və aldıqları həcmlər açıqlanıb.

Marja.az xəbər verir ki, səhmlərin 6 milyon 397 min 190 manatlıq hissəsini Bankda ən böyük payla səhmdar olan Qəribov Eldar Mahmud oğlu əldə edib. Nəticədə Eldar Qəribovun "Unibank"ın nizamnamə kapitalındakı payı 86,6960%-dən 87,0320%-ə yüksəlib. 

Həmçinin, səhmlərin 202 min 164 manatlıq hissəsini Bankın mövcud səhmdarlarından olan Quliyev Emin Natiq oğlu əldə edib. Eyni zamanda, Emin Quliyev bağışlanma müqaviləsi əsasında 3 milyon 394 min 369 manatlıq səhmlər əldə edib. Əqdlərdən sonra Emin Quliyevin "Unibank"ın nizamnamə kapitalındakı payı 0,3592%-dən 2,7504%-ə yüksəlib.

Bunlardan başqa, yeni səhmlərin təxminən 20 min 639 manatlıq hissəsini Hüseynov Faiq Arif oğlu alıb. Əqd nəticəsində Faiq Hüseynovun "Unibank"ın nizamnamə kapitalındakı payı 0,2797%-dən 0,2808%-ə yüksəlib.

Qeyd edək ki, “Unibank” KB” ASC-nin nizamnamə kapitalı 149 milyon 386 min 357.60 manat təşkil edir, səhmlərin buraxılması və yerləşdirilməsi yolu ilə formalaşıb.

Hazırda “Unibank” KB ASC-nin səhmdarları sırasında Azərbaycan Respublikasının rezidenti olan 7 fiziki şəxs var (onlara məxsus səhmlərin nizamnamə kapitalındakı faiz nisbəti 92,5121% təşkil edir) və ən böyük (87,0320%) səhm zərfi Qəribov Eldar Mahmud oğluna məxsusdur.

31 MİLYON MANATLIQ KAPİTALLAŞMA PROSESİ

Xəbər verdiyimiz kimi, "Unibank" 2022-ci il ərzində nəzərdə tutulan kapitallaşma prosesini uğurla başa çatdırıb. Bank kapitallaşmanı nəzərdə tutulan proqrama uyğun, investisiya qiymətli kağızlarının həm səhm, həm də subordinasiya borcu olan istiqraz buraxılışı formasında həyata keçirərək, Bakı Fond Birjasında kütləvi təklif üsulu ilə yerləşdirilməsi nəticəsində kapitalını ümumilikdə 31 milyon manata yaxın artırıb. Hər iki komponent üzrə nəzərdə tutulan kapital artımı il ərzində mərhələli şəkildə həyata keçirilib və 2022-ci ilin sonunda yekunlaşıb.

Kapitallaşma prosesinin başa çatması nəticəsində bankın təkcə nizamnamə kapitalı 19 milyon manata yaxın artaraq, 149 386 358 AZN təşkil edir. Bank tərəfindən investisiya qiymətli kağızı olan istiqrazların buraxılışı ilə reallaşan ikinci komponent üzrə kapital artımı isə 12 milyon 200 min manat olub.

"Kapitallaşmanın artırılması bankın uğurlu inkişafını dəstəkləmək, innovativ bankçılıq həllərinin tətbiqində liderliyi qorumaq, sahibkarlıq subyektlərinin maliyyələşmə imkanlarını artırmaq və müştərilərə yeni rəqəmsal məhsul və xidmətlərin təqdim edilməsinə xidmət edir", - "Unibank" açıqlamasında bildirmişdi. 

HƏMÇİNİN OXU: Unibank səhmdar kapitalı barədə məlumatlarını yenilədi - ƏSAS SƏHMDARININ PAYI DAHA DA ARTIB