Böyük xam neft istehsalçıları BP və Chevron gözlənilən İan qasırğası ilə əlaqədar olaraq Meksika körfəzindəki bəzi dəniz neft platformalarında hasilatı azaltdıqlarını açıqlayıblar.

Marja.a xəbər verir ki, İan indi ikinci kateqoriyalı fırtına kimi təsnif edilir və iki gün ərzində böyük bir qasırğaya çevriləcəyi gözlənilir. 

Digər istehsalçıların, o cümlədən Occidental Petroleum Corporation və Hess Corporation-ın hasilatın azaldın-azaltmayacaqları bəlli olmasa da, şirkətlər vəziyyəti izlədiklərini və bəzi tədbirlər həyata keçirdiklərini bildiriblər.

İanın bu həftənin sonunda Meksika körfəzindən keçərək Floridaya çatması gözlənilir. ABŞ xam neft tədarükünün təxminən 15%-i regionun payına düşür. 

Təklifin müəyyən qədər azalacağının gözlənilməsi, artan faiz dərəcələrinin iqtisadi aktivliyi və xam neftə tələbi azaldacağı ilə bağlı narahatlıqlar səbəbindən bu ay kəskin şəkildə aşağı düşən neft qiymətlərinə fayda verib. Brent neftinin fyuçersləri 0,8% artaraq bir barel üçün 84,70 dollara, ABŞ-ın Qərbi Texas fyuçersləri də 0,7% artaraq bir barel üçün 77,48 dollara çatıb. Artıma baxmayaraq qiymətlər doqquz aylıq minimuma yaxın səviyyələrdədir.

Hər iki neft bazar ertəsi təxminən 5% ucuzlaşmışdı. Sürətlə bahalaşan dollar və Avropada açıq şəkildə iqtisadi yavaşlama qorxusu neft qiymətlərinin düşməsinə səbəb olmuşdu. 

Neft qiymətləri üçüncü rübdə 27%-ədək düşüb, çünki Federal Ehtiyat Sisteminin (FED) və digər mərkəzi bankların açıq siqnalları bu il iqtisadi aktivlik proqnozlarını pisləşdirib.

Çərşənbə axşamı günü 20 ilin ən yüksək səviyyəsinə yaxın ticarət edilən dolların Fed-in faiz artırmaqda davam etməsi ilə daha da yüksələcəyi gözlənilir. 

Neft qiymətləri bu il Rusiya-Ukrayna müharibəsinin başlanması zamanı çatdığı yüksək həddən (126 dollar) kəskin şəkildə aşağı düşüb. 

Lakin münaqişənin potensial eskalasiyası, Rusiya daha çox qoşun səfərbər etdiyi üçün, xammal təchizatını pisləşdirə bilər. Sərt Avropa qışı perspektivi də istilik məqsədilə neftə olan tələbatı artıra bilər. 

Xam neft qiymətləri, xüsusilə qlobal faiz dərəcələri artmağa davam etdikcə, yaxın perspektivdə iqtisadi artımın yavaşlaması ilə bağlı artan narahatlıqlarla mübarizə aparmalıdır.