OPEC+ Texniki Komitəsi 2022-ci ildə dünya bazarında izafi neft təklifi üzrə proqnozunu 0,9 milyon barel/günə yüksəldib. Halbuki bir ay əvvəl təklif profisiti 0,8 milyon barel/gün səviyyəsində proqnozlaşdırılırdı. Marja xəbər verir ki, proqnoz  100 min barel/gün artırılıb.

Həmçinin OPEC+ ekspertləri proqnozlaşdırırlar ki, 2023-cü ildə neft təklifi profisiti əvvəllər gözlənildiyi kimi 0,5 milyon barel yox, 0,9 milyon barel olacaq.

Daha pessimist ssenariyə əsasən, 2022-ci ildə qlobal neft bazarında profisit sutkada 1,3 milyon barelə, 2023-cü ildə isə 1,5 milyon barelə qədər arta bilər. Daha optimist ssenaridə isə 2022-ci ildə izafi neft təklifi 0,6 milyon barel/gün (əvvəllər 0,5 milyon barel/gün) və 2023-cü ildə 0,8 milyon barel/gün (0,4 milyon barel/gün) olacağı gözlənilir.

Sənədə əsasən, OPEC+ texniki komitəsi 2022-ci ildə neftə tələbat artımı proqnozunu sutkada 3,4 milyon bareldən 3,1 milyon barelə endirib. Alyansın texniki panelindəki ekspertlər 2023-cü ildə tələbin sutkada 2,7 milyon barel artaraq 102,7 milyon barelə çata biləcəyini gözləyirlər.

Eyni zamanda, OECD ölkələrinin kommersiya neft ehtiyatları 2022-ci ildə 180 milyon barel artacaq (əvvəllər 175 milyon barel artım gözlənilirdi) - 2021-ci ilin sonundakı 2,648 milyard barelə qarşı 2,824 milyard barelə qədər.

OPEC+ Texniki Komitəsi neft bazarının inkişafı ssenarilərini ənənəvi olaraq saziş ölkələrinin nazirlərinin görüşündən əvvəl qiymətləndirir. Monitorinq komitəsinin iclası və nazirlərin iclası sentyabrın 5-nə təyin edilib. Ekspertlər qrupunun hesabatı nazirlərin monitorinq komitəsinin iclasında vəziyyətin qiymətləndirilməsi üçün əsasdır, məhz bu komitə müəyyən müddət üçün saziş ölkələrinə hasilatın səviyyəsi ilə bağlı tövsiyələr verə bilər. OPEC+ Texniki Komitəsi belə bir funksiyaya malik deyil. 

Qeyd edək ki, OPEC+ Texniki Komitəsinin proqnozlarından sonra dünya bazarlarında neft ucuzlaşıb. Brent neftinin qiyməti 3,5% azalaraq 95,89 dollara geriləyib.