Coca-Cola şirkəti, “ASAN Könüllüləri” Təşkilatı, Ekologiya və Təbii Sərvətlər Nazirliyinin birgə əməkdaşlığı ilə Bakıda keçirilən ekoloji layihə davam edir. Coca-Cola şirkətinin “Tullantısız Dünya” proqramının tərkibində icra olunan layihə HORECA (hotel, restoran, kafe) üzrə fəaliyyət göstərən müəssisələrdən plastik tullantıları toplamaq üçün icra olunur.

Layihənin icra olunmasında məqsəd istifadə olunmuş plastikləri təkrar emala yönləndirmək və bu xammalın ətraf mühitə təsirini azaltmaqdır. Artıq 7 aydır həyata keçirilən layihəyə Bakı şəhərinin müxtəlif yerlərindən 70-dən çox tərəfdaş cəlb edilib. Layihə müddətində ümumilikdə 11 162 kq plastik toplanaraq təkrar emal müəssisələrinə yönləndirilib.

İlkin dövrlərdə restoranlarla icra olunan layihəyə, Bakının ən iri ticarət mərkəzləri olan Gənclik Mall, Dəniz Mall, təhsil müəssisələrindən Bakı Dövlət Universiteti, Azərbaycan Dövlət Memarlıq və İnşaat Universiteti və CinemaPlus kinoteatrlar şəbəkəsi də qoşulub. Layihə çərçivəsində istifadə olunmuş plastik tullantıların toplanması üçün restoranlara, eyni zamanda, Mall ərazisinə qutular yerləşdirilib, həmçinin insanların maarifləndirilməsi üçün müxtəlif məlumatlandırıcı vasitələr paylanılıb.

"Azərbaycan Koka-Kola Bottlers LTD" MMC-nin İctimaiyyətlə Əlaqələr və Kommunikasiya üzrə supervayzeri Aytən Məmmədova bildirib ki, Coca-Cola şirkəti fəaliyyət göstərdiyi ölkələrdə ətraf mühitin mühafizəsi üçün daim müxtəlif layihələr həyata keçirir: “Şirkətimizin hədəfləri sırasında plastik tullantıların təbiətə təsirini azaltmaq və təkrar emala dəstək olmaq ilk sıralarda yer alır. Şadıq ki, Azərbaycanda da “Tullantısız Dünya” proqramının icrasına başlamışıq. Qısa müddətdə layihəmizə çox sayda müəssisə qoşulub. İnanıram ki, layihə çərçivəsində görülən işlərlə ölkəyə faydalı olacağıq”.

Şəhər sakinləri də layihə barədə müsbət fikirlərini bölüşüb, layihə dəstək olmaq üçün plastik tullantıları xüsusi ayrılmış konteynerlərə atdıqlarını və artıq plastik tullantıların təbiətə vurduğu zərər barədə məlumatlı olduqlarını bildiriblər.

Coca-Cola şirkəti bundan əvvəl də “ASAN Könüllüləri” Təşkilatı, Ekologiya və Təbii Sərvətlər Nazirliyi  və digər tərəfdaşlarla birlikdə ekoloji isitaqmətdə  “Təmiz Ölkəm”, “ Təmiz Sumqayıt”, “Xəzəri Qoruyaq” kimi bir sıra layihələr icra edib. Ümümilikdə həmin layihələrdə 50 tondan çox tullantı təkrar emala qaytarılıb.

Qeyd edək ki, “Tullantısız Dünya” proqramı çərçivəsində Coca-Cola 2030-cu ilə qədər bazara çıxardığı bütün qablaşdırmaları toplayıb təkrar emal etməyi hədəfləyir.