Hindistanın ixrac qadağası qərarı buğda bazarında qiymətlərin artmasına səbəb olub.

Marja.az xəbər verir ki, Çikaqoda buğda fyuçersləri 6 faiz artaraq 12,47 dollar/buşel olub. Bu artım son iki ayda görülən ən yüksək artımdır. İlin əvvəlindən buğda qiymətləri 60 faiz artıb.

Hindistan ərzaq təhlükəsizliyi riskinə görə buğda ixracını qadağan etmişdir.

Dehli rəhbərliyi bu addımı ilə ilin əvvəlindən qlobal bazarlarda artan buğda qiymətlərinə ölkə daxilində nəzarət etməyi hədəflədiyini açıqlayıb.

Hindistan buğdasını əsasən qonşu ölkələrə - Banqladeş, Nepal və Şri-Lankaya ixrac edir.

"Avropanın taxıl anbarı" kimi tanınan Ukraynaya Rusiya tərəfindən hücum buğda qiymətlərini son 14 ilin ən yüksək səviyyəsinə çatdırıb.

Ukraynanın ixracı dayanıb

Dünya buğda ixracatında mühüm rolu olan Rusiya ilə Ukrayna arasında yaşanan gərginlik buğda tədarükünə mənfi təsir edib, Ukraynadan buğda ixracı dayanıb, qiymətlər yüksəlib.

Bir çox ölkə buğda kəsirini bağlamaq üçün gözlərini Hindistana çevirib. Dünyanın ikinci ən böyük buğda istehsalçısı olan Hindistanda  həddindən artıq istilər kənd təsərrüfatı sektoruna mənfi təsir edib və məhsuldarlığı azaldaraq tədarük problemini daha da ağırlaşdırıb.

Erkən isti dalğasının kənd təsərrüfatına mənfi təsir göstərdiyi ölkədə 1901-ci ildən bəri ən yüksək səviyyəyə çatan mart ayı temperaturu səbəbindən buğda məhsuldarlığı xeyli azalıb.

Xəbər verdiyimiz kimi, Yeddilik (G7) ölkələrinin kənd təsərrüfatı nazirləri Hindistanın buğda ixracına qadağa qoyması qərarını pisləyib. Onların fikrincə, belə bir addım dünya taxıl bazarında böhranı daha da gücləndirəcək:

"Hər kəs ixracata bu cür məhdudiyyətlər qoymağa və ya hətta bazarları bağlamağa başlasa, bu, yalnız böhranı daha da gücləndirəcək, həmçinin Hindistana və onun kənd təsərrüfatı istehsalçılarına zərər verəcək. Biz Hindistanı G20-nin üzvü kimi məsuliyyəti öz üzərinə götürməyə çağırırıq".

Həmçinin oxu

"Belə bir addım dünya taxıl bazarında böhranı daha da gücləndirəcək"