Bir müddət əvvəl Azərbaycan Quş Əti, Yumurta İstehsalçıları və İxracatçıları Assosiasiyası(APEPEA) quş əti və yumurta istehsalçılarının çətinlikləri, ehtiyaclarını müzakirə etmək üçün dövlət qurumlarına müraciət etmişdi.

Assosiasiyanın Analitika və İctimaiyyətlə əlaqələr departamentinin yaydığı məlumatda bildirilir ki, müraciət olunan dövlət qurumlarından Dövlət Gömrük Komitəsi xaric Assosiasiya üzvləri ilə görüşərək, problemlərimizi dinləyib, onların həlli istiqamətində müəyyən addımlar atılmağa başlanıb. Hətta özəl şirkət olan “Veysəloğlu” Şirkətlər Qrupunun rəhbərliyi də quş əti və yumurta istehsalçıları ilə görüşərək, “Araz” və “OBA” marketlər şəbəkələri yaranan problemləri müzakirə edib.

Məlumatda qeyd edilib ki, indiyədək müraciət etdiyimiz yalnız bir qurumdan – Dövlət Gömrük Komitəsindən sahibkarların müraciətinə hər hansı reaksiya verilməyib.

"Halbuki quş əti və yumurta istehsalçıları bir neçə istiqamətdə gömrük orqanları ilə çətinliklər yaşamaqdadırlar. Məsələn, qanunvericiliyə əsasən kənd təsərrüfatı istehsalı və emalı üçün gətirilən avadanlıqlar idxal rüsumlarından azaddır. Lakin gömrük orqanları ən müxtəlif bəhanələrlə quş əti və yumurta istehsalçılarının gətirdikləri istehsal avadanlıqlarını rüsuma cəlb etməyə çalışırlar. Əvəzində isə Türkiyədə topdansatış qiyməti 50 sent olan 1 günlük cücələrin Azərbaycana idxalını 25 sentə rahatlıqla rəsmiləşdirirlər. Özü də Türkiyədəki satış qiymətlərini təsdiq edən sənədləri dəfələrlə Dövlət Gömrük Komitəsi rəsmilərinə təqdim etdiyimiz halda...", - Assosiasiyanın yaydığı məlumatda bildirilir.

Azərbaycan Quş Əti, Yumurta İstehsalçıları və İxracatçıları Assosiasiyası güman edir ki, Dövlət Gömrük Komitəsinin sədri Səfər Mehdiyevin bu məsələlərdən xəbəri yoxdur: "Buna görə də onunla görüşmək niyyətimizi kütləvi informasiya vasitələrinin köməyilə özünə çatdırmaq qərarına gəldik".