Türkiyə Statistika Xidməti (TÜİK) aprel ayı üzrə istehlakçı və istehsalçı qiymətləri indekslərini açıqlayıb.

Marja.az xəbər verir ki, apreldə ölkədə illik inflyasiya 69,97% olub (2021-ci ilin aprel ayı ilə müqayisədə).

Qiymətlərdə mart ayı ilə müqayisədə aprel ayında 7,25% artım müşahidə olunub.

Aprel ayı məlumatları iqtisadçıların gözləntilərini üstələyib.

Aprel ayında baza inflyasiyası 50 faizdən yuxarı qalıb. Məlumatlar göstərir ki, illik baza inflyasiyası 52,37 faiz təşkil edib.

Məlumatlar istehsalçı inflyasiyasında da yüksəliş sürətinin davam etdiyini göstərib. İstehsalçı qiymətlərinin illik artımı 1995-ci ilin martından bəri ən yüksək artım olub.

TÜİK-in məlumatına görə, istehsalçı qiymətləri indeksi aprel ayında əvvəlki ilin eyni dövrü ilə müqayisədə 121,82% artıb. Aylıq müqayisədə artım 7,67 faiz təşkil edib.

Ərzaq inflyasiyası təxminən 90 faizdir

Məlumatlara görə, əvvəlki ilin eyni ayına nisbətən ən çox artım müşahidə edilən əsas qruplar müvafiq olaraq 105,86 faiz ilə nəqliyyat,  89,10 faiz ilə qida və alkoqolsuz içkilər, 77,64 faizlə məişət malları olub.

Ən aşağı illik artım 18,71 faizlə rabitə qrupunda olub. Əvvəlki ilin eyni ayı ilə müqayisədə artımın aşağı olduğu digər əsas qruplar müvafiq olaraq 26,23% ilə geyim və ayaqqabı, 27,73% ilə təhsil və 35,95% ilə səhiyyə olub.

Aylıq müqayisədə ən yüksək artım 13,38% ilə qidada olub.

Ərzaqdan sonra 7,43 faizlə mənzil, 6,96 faizlə geyim və ayaqqabı gəlir.

İstehsalçı qiymətlərinə enerji təzyiqi

İstehsalçı qiymətləri indeksinə baxıldığında ən çox artımın enerji maddələrində olduğu görülür. TÜİK məlumatlarına görə, indekslərin ən çox artdığı alt sektorlar 249,55% ilə koks və neft məhsulları, 247,50% ilə elektrik enerjisi, qaz, buxar və  243,52% ilə xam neft və təbii qazdır.

Ən aşağı illik artım; 42,08% ilə geyim, 42,09% ilə əsas əczaçılıq məhsulları və preparatları, 60,13% ilə dəri və ona aid məmulatları olub.

İqtisadçılar inflyasiyada sürətin may ayında da davam edəcəyini gözləyirlər.