Rusiyaya qarşı sanksiyalar ABŞ-da inflyasiyanın daha da artmasına səbəb ola bilər və bu, ABŞ prezidenti Co Bayden administrasiyası və noyabrda keçiriləcək Konqresə aralıq seçkilər öncəsi Demokratlar Partiyası üçün çətinliklər yarada bilər.

Marja xəbər verir ki, belə bir qiymətləndirmə çərşənbə günü "The Washington Post" qəzetində dərc olunan məqalədə bildirilir.

Məqalədə qeyd edilib ki, Rusiyanın Ukraynadakı xüsusi əməliyyatı ilə bağlı “sanksiyalar və iqtisadi ziyan” “siyasi baxımdan Bayden üçün əlavə başağrısına çevrilib. Məqalədə deyilir ki, bu, ABŞ-dakı “inflyasiya və iqtisadi böhranla bağlı qorxulardır”.

"Artıq 40 ilin ən yüksək səviyyəsinə çatan inflyasiya artmaqda davam edir", - qəzet qeyd edir.

Nəşr qeyd edir ki, “qiymət artımının bir neçə amili var ki, onların çoxu Rusiyanın Ukraynanı işğal etməsindən xeyli əvvəl mövcud olub.”

Sanksiyalar üzrə ekspertlər qeyd edirlər ki, Rusiyaya qarşı sanksiyaların ABŞ-a necə təsir etdiyini dəqiq müəyyən etmək çətindir. Strateji və Beynəlxalq Araşdırmalar Mərkəzindən dünya iqtisadiyyatı üzrə ekspert Uilyam Ranç deyib ki, insanlar panikaya düşür, bu da inflyasiyanı daha da artırır.

Məqalədə deyilir: “Müharibə və pandemiya bunun əsas hərəkətverici qüvvəsidir, lakin sanksiyalar, xüsusən də son dərəcə sərtləşdirildiyi üçün, enerji və ərzaq məhsulları kimi müxtəlif sahələrdə qiymətləri artıra bilər”.

ABŞ Əmək Departamentinin məlumatına görə, ölkədə illik inflyasiya fevraldakı 7,9%-dən 2022-ci ilin martında 8,5%-ə qədər sürətlənib.

"Bu o deməkdir ki, Baydenin Rusiyanı Ukraynanı işğal etdiyinə görə cəzalandırmaq istəyi qiymət artımlarını cilovlamaq səyləri ilə toqquşa bilər ki, bu da Demokratların Konqresin bir və ya iki palatasına nəzarəti itirməsinə səbəb ola bilər. Bu, sadə həlli olmayan ciddi siyasi problemdir”.

"Bayden qiymətlərin artmasında müharibəni günahlandırmağa çalışır, lakin görünür, bu, seçicilərdə rezonans doğurmur", - məqalədə vurğulanır.

Qeyd edilib ki, Baydenin Rusiya neftinin ABŞ-a tədarükünə qadağa qoyması "simvolik qərar idi", eyni zamanda yanacağın bahalaşmasına səbəb olub.