Rusiya Federasiyasından enerji təchizatı dayandırıldıqda Almaniyanın ümumi itkiləri 2022-2023-cü illərdə təxminən 220 milyard avro (238,2 milyard dollar) təşkil edə bilər.

Marja xəbər verir ki, bu qənaətə Almaniyanın aparıcı iqtisadi qurumlarının, o cümlədən İqtisadi Tədqiqatlar İnstitutunun (Berlin), Ifo İnstitutunun (Münhen), Dünya İqtisadiyyatı İnstitutunun (Kiel) və İqtisadiyyatın Öyrənilməsi İnstitutunun (Essen) ekspertləri gəliblər. Onlar çərşənbə günü ölkə iqtisadiyyatının inkişafı ilə bağlı hesabat təqdim ediblər.

"2022 və 2023-cü illərdə Rusiyadan tədarükün dayandırılması halında ümumi daxili məhsul itkisi illik istehsalın 6,5%-dən çoxunu təşkil edə bilər", ekspertlər xəbərdarlıq edir.

Kieldə yerləşən Dünya İqtisadiyyatı İnstitutunun tədqiqat rəhbəri Stefen Koetz, "Qaz təchizatı dayanarsa, Almaniya iqtisadiyyatı ciddi tənəzzüllə üzləşəcək" deyib.

Çərşənbə günü səhər saatlarında Almaniyanın aparıcı iqtisadi qurumları Ukraynada baş verən hadisələr fonunda 2022-ci ildə ölkə iqtisadiyyatının bərpası ilə bağlı proqnozlarını aşağıya doğru yeniləyiblər. Onların proqnozuna görə, bu il Almaniyanın ÜDM-i cəmi 2,7% artacaq, inflyasiya isə 6,1% olacaq. Payızda ekspertlər 2022-ci ildə ÜDM artımının 4,8%-ə çatacağını güman edirdilər. Eyni zamanda, ekspertlər, əksinə, 2023-cü il üçün iqtisadi canlanma proqnozunu yuxarıya doğru düzəldiblər. Belə ki, onların hesablamalarına görə, gələn il Almaniyanın ÜDM-i 3,1% artacaq. Əvvəllər artımın cəmi 1,9% olacağı güman edilirdi.

Almaniyanın Rusiya qazından təcili imtina edə bilməyəcəyini həm alman ekspertləri, həm də siyasətçilər deyir. Almaniyanın İqtisadiyyat və İqlim Mühafizəsi Nazirliyinin rəsmi proqnozuna görə, Rusiya Federasiyasından qazdan tam müstəqilliyə 2024-cü ilin yayına qədər nail olunacaq. Bu il kömür və neft tədarükünün dəyişdirilməsi gözlənilir.