“AccessBank” QSC 2021-ci il üzrə maliyyə göstəricilərini açıqlayıb.

Marja.az xəbər verir ki, “AccessBank” 2021-ci ili 1 milyon 106 min manat xalis mənfəət ilə başa vurub. Bank 2020-ci ili 2 milyon 621 min manat xalis mənfəət ilə bağlamışdı. Beləliklə, “AccessBank”ın xalis mənfəəti 2020-ci illə müqayisədə 2021-ci ildə 57,8% və ya 1 milyon 515 min manat azalıb. Xalis mənfəətin azalması xərclərin artması və ötən il mümkün zərərlər üçün yaradılan məqsədli ehtiyatlardan vəsaitin azad olmaması, əksinə, ehtiyata ayırma edilməsilə əlaqədardır. Ötən il “AccessBank” böyüyüb, müştərilərə verilən kreditlər və gəlirləri artıb.

“AccessBank”ın faiz gəlirləri 2021-ci ildə 101 milyon 53 min manat (2020-ci ildə 94 milyon 227 min manat), qeyri-faiz gəlirləri 10 milyon 909 min manat (2020-ci ildə 9 milyon 543 min manat) təşkil edib.

2021-ci ildə “AccessBank”ın cəmi əməliyyat gəlirləri (faiz və qeyri-faiz gəlirləri) 111 milyon 962 min manat təşkil edib ki, bu da 2020-ci il ilə müqayisədə 7,9 % (və ya 8 milyon 192 min manat) çoxdur. 2020-ci ildə “AccessBank”ın cəmi əməliyyat gəlirləri 103 milyon 770 min manat təşkil etmişdi.

2021-ci ildə “AccessBank”ın cəmi əməliyyat xərcləri (faiz və qeyri-faiz xərcləri) 110 milyon 698 manat təşkil edib ki, bu da 2020-ci il ilə müqayisədə 8,8 % (və ya 8 milyon 942 min manat) çoxdur. 2020-ci ildə “AccessBank”ın cəmi əməliyyat xərcləri 101 milyon 756 min manat təşkil etmişdi.

Ötən il xərcləri gəlirlərini üstələdiyində “AccessBank”ın  1 milyon 264  min manat əməliyyat mənfəəti yaranıb (2020-ci ildə 2 milyon 14 min manat). Bank mümkün zərərlər üçün yaradılan məqsədli ehtiyatlara 158 min manat ayırdığından illi 1 milyon 106 min manat xalis mənfəət ilə başa vurub. Qeyd edək ki, 2020-ci ildə ehtiyatdan azad olmuş 607 min manat hesabına Bankın mənfəəti 2 milyon 621 min manata yüksəlmişdi.

AKTİVLƏRİ 1 MİLYARD MANATA YAXINLAŞIR

“AccessBank”ın  cəmi aktivləri 2020-ci illə müqayisədə 2021-ci ildə 8,9% və ya 76 milyon 296 min manat artaraq 932 milyon 150 min manata yüksəlib. Bank 2020-ci ilin sonunda 855 milyon 854 min manat cəmi aktivlərə malik idi.

“AccessBank”ın  kredit portfeli (müştərilərə verilmiş kreditlər) 2020-ci illə müqayisədə 2021-ci ildə 25,8% və ya 129 milyon 894 min manat artaraq 632 milyon 476 min manata yüksəlib. 2020-ci ilin sonunda Bankın kredit portfeli 502 milyon 582 min manata çatmışdı.

“AccessBank”ın depozit portfeli 2020-ci illə müqayisədə 2021-ci ildə 9,9% və ya 62 milyon 267 min manat artaraq 689 milyon 828 min manat qalxıb. Bank 2020-ci ilin sonunda 627 milyon 561 min manat cəmi depozitlərə malik idi.

MƏCMU KAPİTALI 80 MİLYON MANATA YAXINDIR

31 dekabr 2021-ci il tarixində “AccessBank” 79 milyon 666 min manat məcmu kapitala malik olub. Bank 31 dekabr 2020-ci il tarixində 79 milyon 203 min manat cəmi kapitala malik idi.