“Bank VTB (Azərbaycan)” ASC 2021-ci il üzrə maliyyə göstəricilərini açıqlayıb.

Marja.az xəbər verir ki, “Bank VTB (Azərbaycan)” 2021-ci ili 4 milyon 213 min manat xalis mənfəət ilə başa vurub. Bank 2020-ci ili 3 milyon 860 min manat xalis mənfəət ilə bağlamışdı. Beləliklə, “Bank VTB (Azərbaycan)”ın xalis mənfəəti 2020-ci illə müqayisədə 2021-ci ildə 9,1%  və ya 353 min manat artıb.

“Bank VTB (Azərbaycan)ın faiz gəlirləri 2020-ci illə müqayisədə 2021-ci ildə 7 milyon 295 min manat və ya 70% artaraq 17 milyon 691 min manat təşkil edib. O cümlədən, Bankın müştərilərə verdiyi kreditlər üzrə faiz gəlirləri 1,8 dəfə artaraq 14 milyon 31 min manata yüksəlib.

“Bank VTB (Azərbaycan)ın qeyri-faiz gəlirləri 2020-ci illə müqayisədə 2021-ci ildə 3 milyon 446 min manat və ya 91,3% artaraq 7 milyon 221 min manat təşkil edib.

“Bank VTB (Azərbaycan)ın faiz xərcləri 2020-ci illə müqayisədə 2021-ci ildə  1 milyon 602 min manat və ya 49,6% artaraq 4 milyon 835 min manat, qeyri-faiz xərcləri isə 4 milyon 700 min manat və ya 25% artaraq 23 milyon 531 min manat təşkil edib.

Ötən il Bankın cəmi əməliyyat gəlirləri 10 milyon 741 min manat, cəmi əməliyyat xərcləri isə 6 milyon 302 min manat artıb.

2021-ci ildə “Bank VTB (Azərbaycan)ın cəmi əməliyyat gəlirləri (faiz və qeyri-faiz gəlirləri) 24 milyon 912 min manat, əməliyyat xərcləri (faiz və qeyri-faiz xərcləri) 28 milyon 366 min manat, xərclər gəlirləri üstələdiyindən əməliyyat zərəri 3 milyon 454 min manat təşkil edib. Əməliyyat zərəri, mümkün zərərlər üçün yaradılan məqsədli ehtiyatlardan azad olmuş 8 milyon 504 min manatın hesabına bağlanıb. Müqayisə üçün qeyd edək ki, 2020-ci ildə  Bank VTB (Azərbaycan)ın cəmi əməliyyat gəlirləri 14 milyon 170 min manat, əməliyyat xərcləri 22 milyon 64 min manat, əməliyyat zərəri 7 milyon 894 min manat təşkil etmişdi. Həmin il də əməliyyat zərəri mümkün zərərlər üçün yaradılan məqsədli ehtiyatlardan azad olmuş 12 milyon 585 min manatın hesabına bağlanılmışdı.

BANK BÖYÜYÜB, MÜŞTƏRİLƏRƏ VERİLMİŞ KREDİTLƏR ARTIB

31 Dekabr 2021-ci il tarixində “Bank VTB (Azərbaycan) 232 milyon 326 min manat cəmi aktivlərə, o cümlədən 165 milyon 86 min manat kredit portfelinə (müştərilərə verilmiş kreditlər) malik olub. Bank 2020-ci ilin sonunda 187 milyon 341 min manat cəmi aktivlərə, o cümlədən 125 milyon 870 min manat kredit portfelinə malik idi.

31 Dekabr 2021-ci il tarixində “Bank VTB (Azərbaycan) 63 milyon 180 min manat məcmu kapitala malik olub.

Qeyd edək ki, Bank VTB (Azərbaycan) ASC-nin nizamnamə kapitalının 99,9999 %-i Bank VTB-yə (Rusiya), 0,0001%-i fiziki şəxslərə məxsusdur.