Qərargahı Londonda yerləşən İqtisadiyyat və Biznes Araşdırmaları Mərkəzinin (CEBR) hesabatına əsasən, dünya iqtisadiyyatının həcmi (ümumi daxili məhsul istehsalı) 2022-ci ildə ilk dəfə 100 trilyon dolları keçəcək.

Marja.az hesabata istinadən xəbər verir ki, dünya iqtisadiyyatı 2022-ci ildə ilk dəfə olaraq cari qiymətlərlə 100 trilyon dolları keçməyə hazırlaşır, bu, əvvəlki proqnozdan iki il əvvəl reallaşa bilər. CEBR keçən il hesablamışdı ki, dünya ÜDM-i ilk dəfə 2024-cü ildə 100 trilyon dolları keçəcək.

Çin 2030-cu ilə qədər dünyanın ən böyük iqtisadiyyatı olmaq üçün ABŞ-ı keçəcək. CEBR bir il əvvəl Çinin 2028-ci ilə qədər ABŞ-ı keçəcəyini proqnozlaşdırmışdı.

Çinin iqtisadi artımı 2020-2025-ci illərdə orta hesabla 5,7 faiz, 2026-2030-cu illərdə 4,7 faiz, 2030-2035-ci illərdə isə 3,7 faiz təşkil edəcək.

CEBR-in proqnozlarına görə, Hindistan gələn il yenidən dünyanın 6-cı ən böyük iqtisadiyyatı olaraq Fransanın yerini alacaq və 2031-ci ildə əvvəlcədən proqnozlaşdırılandan bir il sonra 3-cü ən böyük iqtisadiyyata çevriləcək.

Avropanın ən böyük iqtisadiyyatı olan Almaniya 2033-cü ildə Yaponiya iqtisadiyyatını keçəcək.

2036-cı ildə dünyanın ən yaxşı 10 iqtisadiyyatı müvafiq olaraq Çin, ABŞ, Hindistan, Almaniya, Yaponiya, İngiltərə, Fransa, İndoneziya, Braziliya və Rusiya olacaq. Covid-19-dan sonra sürətli iqtisadi artımdan faydalanan Kanada 11-ci, Cənubi Koreya 12-ci, İtaliya 13-cü, Avstraliya 14-cü, İspaniya 15-ci, Meksika 16-cı, Səudiyyə Ərəbistanı 17-ci, Hollandiya 18-ci, Türkiyə 19-cu və Vyetnam 20-ci yeri tutacaq.

Hesabata görə, Kovid-19-un yaratdığı səhiyyə və iqtisadi böhrandan bərpa davam etdikcə qlobal ümumi daxili məhsul ( ÜDM) artacaq, lakin inflyasiya davam edərsə, siyasətçilər üçün iqtisadiyyatların yenidən tənəzzülə düşməsinin qarşısını almaq çətin olacaq.

CEBR-in vitse-prezidenti Douglas McWilliams, "2020-ci illər (2022-2029-cu illərdə) üçün vacib məsələ dünya iqtisadiyyatlarının inflyasiya ilə necə mübarizə aparacağıdır" deyib.

McWilliams, pul siyasətində "təvazökar" bir düzəlişin müvəqqəti olmayan prosesləri nəzarət altına alacağına ümid etdiklərini və inflyasiya nəzarət altına alınmasa, dünya iqtisadiyyatının 2023 və ya 2024-cü illərdə tənəzzülə hazırlaşmalı olacağını iddia edib.