8-11 dekabr tarixlərində ölkənin qabaqcıl korporativ maliyyə institutu PAŞA Bank tərəfindən “Rəqəmsal Zirvələr Konfransı” keçirildi. Cəmiyyətdəki texnoloji, innovativ və yaradıcı sahələrin inkişafına yönəlmiş 4-günluk tədbirdə məshul sahibliyi, proqram təminatı və yaradıcı dizayn kimi mövzular üzrə həm yerli həm də xarici spikerlər öz təcrübələri bölüşüblər.

Onlayn formatda canlı yayımlalan tədbirin ilk günündə “ProductHunt” şüarı altında müxtəlif şirkətlərin mütəxəssisləri məhsul sahibliyinin şirkətdəki rolu və bu sahədə uğur qazanmağın sirlərini iştirakçılarla bölüşüblər. DevOps günü çərçivəsində nəhəng şirkətlərin nümayəndələri iştirakçılarla rəqəmsal mühəndislik mövzusunda təcrübələrini paylaşıblar. Konfransın 3-cü günü spikerlər “UX/UI” barədə aktual mövzular haqqında danışıb, iştirakçıları maraqlandıran sualları cavablandırıblar. Son gündə isə Data haqqında müzakirələr baş tutub. Tədbirdə panel diskussiyası və “workshop” kimi interaktiv hissələrdə spikerlər tədbir iştirakçılarının bazardakı aktual olan suallarını cavablandırıblar.

“Rəqəmsal Zirvələr Konfransı”-nın açılışında çıxış edən PAŞA Bankın Baş icraçı direktoru və İdarə heyətinin sədri Taleh Kazımovun sözlərinə görə, indiki zamanda yeniliklər gətirmək üçün ən əsas amil sahibkarlıq ruhu olan insanları tapmaq və onlara resurslar verməkdir.

“Digər vacib amil isə innovativ texnologiyaların və həllərin istifadəsidir. Kəskin dəyişən biznes mühitində rəqəmsallaşma vacib amillərdən biridir. İqtisadiyyatın real sektorunun aparıcı qüvvəsi olaraq, PAŞA Bank yenilikçi və potensiala malik olan şəxsləri dəstəkləyib həm ölkəmiz həm də cəmiyyətimiz üçün vacib layihələrin reallaşdırılması üçün dəstək verməyə hazırdır”,  -deyə, T. Kazımov bildirib.

“Rəqəmsal Zirvələr Konfransı 2021” tədbirinə ümumi 400-dən çox fiziki olaraq iştirakçı qatılıb. Böyük maraqa səbəb olan tədbirin gələcək illərdə yenidən keçirilməsi düşünülür.  

Xatırladaq ki, “PAŞA Bank”  İT seqmenti və rəqəmsal bankçılıq sahəsində aktual mövzuları  müəyyənləşdirən maliyyə texnologiyaları sənayesində baş verən yenilikləri və ən son təcrübələri ölkəmizdə daha əlçatan etməyi hədəfləyir. PAŞA Bankın bu istiqamətdəki layihələri və tədbirləri növbəti il boyunca davam edəcək.