OPEC+ ölkələri oktyabr-noyabr aylarında neft ixracını əhəmiyyətli dərəcədə artırıblar ki, bu da son həftələrdə Brent qiymətlərinin azalmasına səbəb olub. Bununla belə, saziş ölkələrinin hasilat potensialları məhduddur və məlum hesablamalardan az ola bilər. Birləşmiş Krallığın "Vortexa" konsaltinq şirkəti öz hesabatında yazır ki, tələbin davamlı artması ilə OPEC+un sərbəst istehsal gücü gələn il ərzində tükənə bilər.

Marja.az xəbər verir ki, OPEC+ sazişi ölkələri bu ilin may ayından neft hasilatına qoyulan məhdudiyyətləri zəiflədirlər, lakin onların heç də hamısı hasilatı və ixracı həqiqətən artıra bilməyiblər, bu da son aylarda neftin qiymətinin artmasına təkan verib. Yalnız Səudiyyə Ərəbistanı və Birləşmiş Ərəb Əmirlikləri xaricə neft tədarükündə nəzərəçarpacaq artım təmin edə biliblər ki, onların ümumi ixracı hazırda 2021-ci ilin birinci yarısında orta göstəricidən 2 milyon barel çoxdur.

“Lakin onların əlavə təklifi digər ixracatçılardan, o cümlədən Rusiyadan artımın olmaması səbəbindən "yeyilib”, - hesabatda deyilir. 

"Vortexa" hesab edir ki, alyansın digər ölkələri durğunluq və hətta hasilatda azalma nümayiş etdiriblər.

ABŞ Energetika Departamentinin məlumatına görə, oktyabrda sərbəst qlobal istehsal gücü sutkada 6,2 milyon barel, Səudiyyə Ərəbistanının Energetika Nazirliyinin məlumatına görə isə cəmi 3-4 milyon barel/gün təşkil edir. 

"Vortexa" bu təxminlərlə razılaşmır və bu gün dünyada 3 milyon barreldən çox real ehtiyat istehsal gücü olmadığını hesab edir:

"Bunun 2 milyon bareli Səudiyyə Ərəbistanının, digər 1 milyon bareli isə Rusiya və Birləşmiş Ərəb Əmirliklərinin payına düşür. Əgər həqiqətən tələbat 2019-cu ilin böhrandan əvvəlki səviyyəyə çatarsa ​​və bir çox ölkələrdə istehsal müəyyən sürətlə azalmağa davam edərsə, o zaman sərbəst istehsal gücü formasındakı təhlükəsizlik yastığı növbəti 12 ay ərzində bitə bilər”, - Vortexa müəllifləri yekunlaşdırıblar.