Hindistanın aşağı büdcəli (lou-kost) aviaşirkəti "Akasa Air" və Amerikanın "Boeing" aerokosmik korporasiyası 72 Boeing 737 MAX sərnişin təyyarəsinin tədarükü üçün müqavilə imzalayıb. 

Marja.az xəbər verir ki, bu barədə çərşənbə axşamı "Boeing"in rəsmi saytında dərc edilmiş press-relizində bildirilib.

Sifarişin ümumi dəyərinin təxminən 9 milyard dollar olduğu qeyd edilir.

Razılaşmaya əsasən, Hindistan aviaşirkəti yeni nəsil 737 MAX təyyarəsinin iki variantını alacaq, onlardan biri salonda sərnişin oturacaqlarının sayı artırılmış modeldir. 

“Biz "Boeing" ilə əməkdaşlıq etməkdən şadıq, bu, təyyarələrin alınması ilə bağlı ilk sövdələşməmizdir. Ümid edirik ki, yeni Boeing 737 MAX iqtisadi, etibarlı, sərfəli və dayanıqlı Hindistan aviaşirkəti statusumuzu qoruyacaq”, - deyə "Akasa Air"in direktoru Vinay Dube bildirib.

"Lou-kost" aviaşirkətin rəhbəri, “Hindistan aviasiya bazarının dünyada ən sürətlə inkişaf edən bazarlardan biri olduğuna və misilsiz potensiala malik olduğuna” da diqqət çəkib. 

"Artıq hava nəqliyyatı bazarında canlanma görürük və onun böyüməsi onilliklər ərzində davam edəcək" - Vinay Dube deyib.

"Akasa Air" Hindistanın yeni ucuz hava yolu şirkətidir. O, bu il Hindistanın biznes maqnatı Rakesh Jhunjhunjwala və digər Hindistan aviaşirkəti "Jet Airways"in keçmiş direktoru Vinay Dube tərəfindən təsis edilib. Aşağı büdcəli aviaşirkət Hindistan Aviasiya Nazirliyindən uçuş sertifikatı aldıqdan sonra gələn il uçuşlara başlamağı planlaşdırır.

2018 və 2019-cu illərdə Boeing 737 MAX ilə iki təyyarə qəzasından sonra Hindistan hakimiyyəti bu tip təyyarələrin istismarını dayandırıb. "Akasa Air", "Boeing"in bu modelin sistemlərinin dərin modernləşdirilməsini həyata keçirdikdən sonra ölkədə onlardan istifadə etmək arzusunu bəyan edən ilk aviaşirkət olub.

2018-ci ilin oktyabr ayında İndoneziyanın "Lion Air" şirkətinə məxsus Boeing 737 MAX təyyarəsi yola düşdükdən qısa müddət sonra  dənizinə düşüb və göyərtəsində olan 189 nəfərin hamısı həlak olub. Bu modelin ikinci təyyarə qəzası 2019-cu ilin martında Efiopiyada baş verib və 157 nəfər həlak olub. Bundan sonra bir çox ölkələrdə, o cümlədən Hindistanda laynerin fəaliyyəti dayandırılıb.

Boeing rəhbərliyi etiraf edib ki, hər iki təyyarənin qəzaya uğramasına səbəb MCAS avtomatik idarəetmə sisteminin nasazlığı olub. Daha sonra aviasiya konserni bu sistemin işində dəyişikliklər edib. İndi bir sıra ölkələrdə - məsələn, ABŞ, Böyük Britaniya, Qazaxıstanda təyyarənin istismarına yenidən icazə verilir.