Laos hökuməti ölkədə kriptovalyutanın "mədənçiliyinə" və ticarətinə icazə verib.

Marja xəbər verir ki, bu barədə bazar ertəsi "Laotian Times" qəzeti Laos Texnologiya və Telekommunikasiya Nazirliyinin fərmanına istinadən məlumat yayıb.

Məlumata görə, Laos şirkətləri kriptovalyuta hasil edə və ya onunla ticarət əməliyyatları apara bilərlər. Eyni zamanda, şirkətlərdən ödəmə qabiliyyətini təsdiqləmək üçün Laosun mərkəzi bankına 5 milyon dollar məbləğində depozit qoyması tələb olunur. Bu şirkətlər də əldə etdikləri gəlirdən 15% vergi ödəməli olacaqlar.

Bundan əlavə, ölkə hakimiyyəti elektrik enerjisinin idxalı və ixracını idarə edən "Électricité du Laos" dövlət korporasiyasını belə şirkətlərə elektrik enerjisinin verilməsinə görə vergi ödəməkdən azad edəcək. Bu tədbir, kriptovalyutaların "istehsalını" stimullaşdırmaq məqsədi daşıyır.

Sentyabr ayında Laos hökuməti kriptovalyutanın sınaq istifadəsini təsdiqləmişdi. Dörd tikinti şirkəti, bir İT şirkəti və dövlət bankı JDB  kriptovalyutaların çıxarılması və ticarəti üçün icazə almışdılar.

Kriptovalyutanın istifadəsi ilə bağlı müxtəlif ölkələrin mövqeləri əhəmiyyətli dərəcədə fərqlənir. Məsələn, 2014-cü ildə Sinqapur Bitcoin-lə əməliyyatları mal və xidmətlər vergisinə cəlb edilən əməliyyatlara bərabərləşdirib. Bu ilin yanvar ayında Malayziyada kriptovalyutalar qiymətli kağız statusu alıb. İyul ayında El Salvador dünyada Bitcoin-i ödəniş vasitəsi kimi leqallaşdıran ilk dövlət olub.

Bəzi dövlətlər həm fiziki, həm də hüquqi şəxslər tərəfindən kriptovalyutaların istifadəsini qadağan edir. Onların arasında Misir, Nepal, Boliviya, Şimali Makedoniya, Əlcəzair, Banqladeş də var. Çində fiziki şəxslərə kriptovalyutaya sahib olmaq qadağan edilmir. Lakin 2013-cü ildən maliyyə təşkilatları üçün onunla əməliyyatların aparılmasına qadağa qoyulub. 2017-ci ildə Çin hakimiyyəti ölkədə fəaliyyət göstərən bütün kriptovalyuta birjalarını bağlayıb və ICO-nu məhdudlaşdırıb. 2018-ci ildə kriptovalyuta istehsalı rəsmi olaraq qadağan edilib. Eyni zamanda, məhdudiyyətlər rəsmi kriptovalyutaya - rəqəmsal yuana şamil edilmir.