"Təchizat problemləri və enerji qiymətlərinin artması səbəbindən iqtisadi artım yavaşlayır".

Marja xəbər verir ki, bu sözləri Avropa Mərkəzi Bankının prezidenti Kristin Laqard bildirib.

O həmçinin qeyd edib ki, enerji qiymətlərindəki artım və ya tədarük məhdudiyyətlərinin davam etməsi inflyasiyanın uzun müddət yüksək səviyyədə qalmasına təsir edəcək.

Laqard Avropa Parlamentinin (AP) İqtisadi və Maliyyə Məsələləri Komitəsinin “Monetar Dialoq” sessiyasına videokonfrans vasitəsilə qoşulub.

Avro Bölgəsində iqtisadiyyatın üçüncü rübdə 2,2 faiz böyüdüyünü xatırladan Laqard, ümumi daxili məhsulun (ÜDM) yeni növ koronavirus (Kovid-19) epidemiyasının sonuna qədər əvvəlki səviyyələrə çatacağını gözlədiklərini ifadə edib.

İstehlak xərclərinin yüksək olmasına baxmayaraq,  material, avadanlıq və işçi qüvvəsi çatışmazlığının istehsala təsir etdiyini və qarşıdakı  iqtisadi inkişafı zəiflətdiyini ifadə edən Laqard, "Təchizat məhdudiyyətlərinin bir neçə ay davam edəcəyi və 2022-ci ildə tədricən azalacağı ehtimalı var", - deyə bildirib. 

Təchizat problemlərinin mövcud inkişaf prosesində mənfi təsirli yeganə risk olmadığını vurğulayan Laqard, “Enerji qiymətlərinin daha da artması alıcılıq qabiliyyətini aşağı salmaqla və istehlakda canlanmanı dayandırmaqla artımı zəiflədə bilər”, - deyə əlavə edib.

Oktyabrda inflyasiyanın gözləniləndən çox artaraq 4,1 faizə yüksəldiyini xatırladan Laqard, inflyasiyanın yüksəlişinin enerji qiymətlərindəki artım, iqtisadiyyatın yenidən açılması ilə bağlı tələbin artması və Almaniyada keçən il tətbiq edilən müvəqqəti ƏDV fasilələrinin sona çatması ilə bağlı olduğunu açıqlayıb. 

"Mövcud fyuçers qiymətləri 2022-ci ilin birinci yarısında enerji qiymətlərində nəzərəçarpacaq dərəcədə azalmaya işarə edir. İqtisadiyyatın bərpası davam etdikcə və təchizat problemləri azaldıqca, biz mal və xidmətlər üzərində qiymət təzyiqinin normala dönəcəyini gözləyə bilərik" - deyə Laqard gələn il inflyasiyanın azalacağını gözlədiklərini də bildirib: "Enerji qiymətlərindəki artım və ya tədarük məhdudiyyətləri davam edərsə, inflyasiya indiki gözləntimizdən daha yüksək olaraq qala bilər. Bu isə  daha yüksək xərc və  yüksək qiymətlərə səbəb olar".

Avrozonada illik inflyasiya oktyabrda 4,1 faizə - son 13 ilin ən yüksək səviyyəsinə çatıb.

Avropada başda təbii qaz və elektrik kimi enerji məhsullarının ümumi qiymət artımı xüsusilə diqqət çəkir.