2021-ci ilin ilk 6 ayının sonunda “PAŞA Bank” ASC-nin cəmi aktivləri 5 milyard 920 milyon 485 min manata çatıb ki, bu da ötən ilin sonu ilə müqayisədə 7,3% və ya 404 milyon 94 min manat çoxdur. Ötən ilin sonunda PAŞA Bankın cəmi aktivləri 5 milyard 516 milyon 391 min manat təşkil etmişdi.

Marja xəbər verir ki, bu barədə 2021-ci ilin ilk yarısının maliyyə nəticələrinə həsr olunan mətbuat konfransında “PAŞA Bank” ASC-nin İdarə Heyətinin üzvü, Baş maliyyə inzibatçısı Bəhruz Nağıyev bildirib.

Bəhruz Nağıyev aktivlərdəki artımı izah edərək deyib ki, aktivlərin artmasının əsas mənbəsi müştərilərdən cəlb edilən vəsaitlərin artması və bu vəsaitlərin aktivlərdə dəyəndirilməsidir:

“Bir neçə səbəb var. Təbii ki, əsas mənbə müştəri hesablarına cəlb edilən vəsaitlərdir ki, bunu da aktivlərdə dəyərləndirmişik. Müştəri hesablarındakı artımın səbəbi isə ölkədə aparılan şəffaflaşma siyasətidir. Ölkədəki şəffaflaşma siyasəti bizim balansda artımla əks olunur. Şəffaflaşma, şirkətlərin daha çox banklar ilə işləməyə maraq göstərmələri və dövriyyələrin artması ilə müştəri hesabları da artır. Biz korporativ bankıq və korporativ bank üçün önəmlidir ki, cari heablardakı vəsait artsın. Bu, dövriyyələrin olduğuna işarədir və bu da bizi sevindirir”.

Bəhruz Nağıyev əlavə edib ki, ilk 6 ayda müştərilərdən cəlb olunan vəsaitlər 14% və ya 540 milyon 104 min manat artaraq 4 milyard 506 milyon 393 min manata çatıb. Ötən ilin İyun ayının sonu ilə müqayisədə isə müştərilərdən cəlb olunan vəsaitlər 23,4% və ya 853 milyon 941 min manat artıb.

“Gələn vəsaitləri kredit portfelində dəyərləndirmişik. Cari ilin ilk 6 ayında kredit portfeli 4% və ya 95 milyon 925 min artaraq 2 milyard 259 milyon 340 min manata çatıb. Oktyabr ayına olan məlumata görə, PAŞA Bankın kredit portfeli 2,4 milyard manata yüksəlib”.

Həmçinin PAŞA Bank vəsaitləri qiymətli kağızlara investisiya yatırmaqla da dəyərləndirib. Ötən ilin sonu ilə müqayisədə Bankın qiymətli kağızlara investisiyaları 286 milyon 502 min manat və ya 18% artaraq 1 milyard 876 min 604 min manata çatıb. Ötən ilin ilk 6 ayının yekunu ilə müqayisədə isə qiymətli kağızlara investisiyalar 652 milyon 196 min manat və ya 53,2% artıb.

Həmçinin oxu

PAŞA Bank qrupunun xalis mənfəəti 76%-ə yaxın artıb