Azərbaycan Mərkəzi Bankı 31 avqust 2021-ci il tarixinə olan bank sektorunun əsas göstəricilərini açıqlayıb.

Marja göstəricilərə istinadən xəbər verir ki, iyul ayının sonu ilə (31.07.2021) müqayisədə avqustda bank sektorunun cəmi aktivləri 241,4 milyon manat və ya 0,7% azalaraq 33 milyard 426,7 milyon manata geriləyib. İyulun sonunda sektroun cəmi aktivləri 33 milyard 668,1 milyon manata çatmışdı.

Cəmi aktivlərin düşməsinin əsas səbəbi "digər aktivlərin" 488,7 milyon manat azalması ilə əlaqədardır.

KREDİT PORTFELİ 15 MİLYARD MANATI KEÇİB

İyul ayı ilə müqayisədə Avqustda bankların kredit portfeli (müştərilərə verilən kreditlər) 240,3 milyon manat artaraq 15 milyard 206,8 milyon manata, xalis kreditlər (kreditlər üzrə mümkün zərərlərin ödənilməsi üçün məqsədli ehtiyat xaric kreditlər) 224,3 milyon manat artaraq 13 milyard 981.9 milyon manata çatıb.

DEPOZİTLƏR AZALIB

Avqustda bankların cəmi öhdəlikləri 286,7 milyon manat azalaraq 31 avqust 2021-ci il tarixində 28 milyard 613 milyon manat təşkil edib.  O cümlədən avqustda cəmi depozitlər 99.6 milyon manat azalaraq 22 milyard 749,7 milyon manata düşüb.

İyul ayı ilə müqayisədə Avqustda bankların cəmi kapitalı 45,3 milyon manat artaraq 4 milyard 813,7 milyon manata yüksəlib. 2020-ci ilin sonu ilə müqayisədə (8 ayda) bankların cəmi kapitalı 114,5 milyon manat artıb.

Həmçinin oxu

Azərbaycan əhalisi bu il kredit borcunu 700 milyon manatdan çox artırıb

XALİS MƏNFƏƏT CÜZİ ARTIB

Azərbaycanın bank sektoru 2021-ci ilin 8 ayını 455,2 milyon manat xalis mənfəət ilə başa vurub. 2020-ci ilin 8 ayı ilə müqayisədə bank sektorunun xalis mənfəəti 17,5 milyon manat və ya 4% artıb. 

Sektor ötən ilin yanvar-avqust dövrünü 437,7 milyon manat xalis mənfəət ilə bağlamışdı.

Azərbaycanın bank sektorunun 2021-ci ilin 8 ayında faiz gəlirləri 1 milyard 362 milyon manat, qeyri-faiz gəlirləri 576.2 milyon manat təşkil edib (vəmi 1, milyard 938.2 milyon manat). 2020-ci ilin 8 ayında sektorun faiz gəlirləri 1 milyard 267.7 milyon manat, qeyri-faiz gəlirləri 425.8 milyon manat təşkil etmişdi (cəmi 1, milyard 693.5 milyon manat).