2021-ci ilin iyul ayında Azərbaycanın bank sektorunun xalis mənfəəti 42,6 milyon manat təşkil edib. Bu, İyun ayındakı xalis mənfəət ilə müqayisədə 2 dəfədən çox azdır.

Marja Mərkəzi Bankın statistikasına istinadən xəbər verir ki, 2021-ci ilin 6 ayı ərzində bank sektrounun xalis mənfəəti 366,3 milyon manat ikən, 7 ayda 408,9 milyon manata yüksəlib.

Bank sektorunun xalis mənfəəti Yanvarda 25,4 milyon manat, Fevralda 47,7 milyon manat, Martda 75,7 milyon manat, Apreldə 45,9 milyon manat, Mayda 78,5 milyon manat, İyunda 93,1 milyon manat təşkil edib.

İyun ayı ilə müqayisədə İyulda bank sektorunun xalis mənfəəti 2,2 dəfə azalıb

GƏLİRLƏR ARTIB

2021-ci ilin 7 ayı ərzində bank sektorunun cəmi əməliyyat gəlirləri 1 milyard 672,5 milyon manat, o cümlədən faiz gəlirləri 1 milyard 184,6 milyon manat, qeyri-faiz gəlirləri 487,9 milyon manat təşkil edib. 

Müqayisə üçün qeyd edək ki, 2020-ci ilin 7 ayında bank sektorunun cəmi əməliyyat gəlirləri 1 milyard 483,1 milyon manat, o cümlədən faiz gəlirləri 1 milyard 109,8 milyon manat, qeyri-faiz gəlirləri 373,3 milyon manat təşkil etmişdi. 

XƏRCLƏR ARTIB

2021-ci ilin 7 ayı ərzində bank sektorunun 1 milyard 672,5 milyon manat cəmi əməliyyat gəlirlərinə qarşı cəmi əməliyyat xərcləri 1 milyard 98 milyon manat (307,1 milyon manatı faiz xərcləri, 771,5 milyon manatı qeyri-faiz xərcləri) təşkil edib. Gəlirlər xərcləri üstələdiyindən sektorun 574,7 milyon manat əməliyyat mənfəəti yaranıb. Bank sektoru əməliyyat mənfəətindən 94 milyon manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırma edib və 71,9 milyon manatlıq mənfəət vergisi ödəyib. 

Xatırladaq ki, 2020-ci ilin 7 ayı ərzində bank sektorunun 1 milyard 483,1 milyon manat əməliyyat gəlirlərinə qarşı əməliyyat xərcləri 976 milyon manat (281,7 milyon manatı faiz xərcləri, 657,4 milyon manatı qeyri-faiz gəlirləri) təşkil etmiş, gəlirlər xərcləri üstələdiyindən sektorun 507,1 milyon manat əməliyyat mənfəəti formalaşmışdı. Eyni zamanda ehtiyatdan azad olmuş 16,2 milyon manat mənfəətə əlavə edilmişdi. Sektor 523,4 milyon manat mənfəətdən 95,3 milyon manat mənfəət vergisi ödəmişdi.