“PAŞA Bank” ASC-nin Türkiyədəki törəməsi “PAŞA Yatırım Bankası” bu ilin I yarısını 26 milyon 19 min lirə (5 milyon 204 min manat) xalis mənfəətlə başa vurub.

Bankın maliyyə hesabatına görə, bu, ötən ilin eyni dövrü ilə müqayisədə 2,3 dəfə çoxdur.

Yanvar-iyun aylarında "PAŞA Yatırım Bankası"nın faiz gəlirləri 92 milyon 225 min lirə (18 milyon 445 min manat, 1 il əvvələ nisbətən 55,9% çox), faiz xərcləri 43 milyon 930 min lirə (8 milyon 786 min manat, 89,6% çox), haqq və komissiya gəlirləri 3 milyon 362 min lirə (672 min manat, 81,2% az), qiymətli kağızların alqı-satqısından gəlirləri 6 milyon 984 min lirə ( milyon 397 min manat, 2,9 dəfə çox), inzibati xərcləri 12 milyon 480 min lirə (2 milyon 496 min  manat, 26,8% çox), digər gəlirləri 9 milyon 612 min lirə (1 milyon 922 min manat, 3,3 dəfə çox), digər xərcləri 10 milyon 606 min lirə (2 milyon 121 min manat, 6,4% az), xüsusi ehtiyatlara ayırmaları 11 milyon 232 min lirə (2 milyon 246 min  manat, 45% çox), mənfəət vergisi ödəmələri isə 7 milyon 916 min lirə (1 milyon 583 min manat, 2,5 dəfə çox) təşkil edib.

Bu il iyulun 1-nə “PAŞA Yatırım Bankası”nın aktivləri 2 milyard 617 milyon 808 min lirə (523 milyon 562 min manat) olub ki, bu da illik müqayisədə 29,4% çoxdur. Bunun 1 milyard 726 milyon 261 min lirəsi (345 milyon 252 min  manat) müştərilərə verilmiş xalis kreditlərdir. Son 1 ildə Bankın kredit portfeli 30,1% böyüyüb.

Hesabat dövründə “PAŞA Yatırım Bankası”nın öhdəlikləri 37,1% artaraq 2 milyard 29 milyon 68 min lirəyə (405 milyon 814 min manat), balans kapitalı isə 8,5% artaraq 588 milyon 740 min lirəyə (117 milyon 748 min manat) çatıb.

Xatırladaq ki, "PAŞA Yatırım Bankası" 2015-ci ildə "PAŞA Bank"ın Türkiyənin "Aksoy Holdinq"inə məxsus "TAİB Bank"ın səhmlərini alması ilə yaradılıb. Onun nizamnamə kapitalı 500 milyon lirədir (100 milyon manat). Bankın səhmlərinin 50,96%-i “PAŞA Bank”a, 49%-i Bankın daxil olduğu “PAŞA Holdinq” MMC-yə, 0,04%-i isə “Aksoy Holdinq”ə məxsusdur. 

1 lirə = 0,2 manat

Telegramda Marja.az səhifəsinə abunə olun

Renkinq