"Premium Bank” ASC 2021-ci ilin 1-ci yarısını (yanvar-iyun dövrünü) 8 milyon 225 min manat xalis mənfəət ilə başa vurub. Bu, ötən ilin eyni dövrü ilə müqayisədə 8,2% çoxdur. Belə ki, "Premium Bank” 2020-ci ilin 1-ci yarısını 7 milyon 600 min manat xalis mənfəət ilə bağlamışdı. Xalis mənfəətin böyük hissəsi ehtiyatdan azad olmuş vəsaitin hesabınadır. Bankın əməliyyat mənfəəti kəskin azalıb.

GƏLİRLƏRİ AZALIB

Marja Bankın rüblük hesabatlarına istinadən xəbər veri ki, 2021-ci ilin ilk 6 ayında "Premium Bank"ın cəmi əməliyyat gəlirləri (faiz və qeyri-faiz gəlirləri) 22 milyon 874 min manat, əməliyyat xərcləri (faiz və qeyri-faiz xərcləri) 22 milyon 383 min manat təşkil edib, gəlirlər xərcləri üstələdiyindən Bankın 491 min manat əməliyyat mənfəəti yaranıb. Mümkün zərərlər üçün yaradılan məqsədli ehtiyatlardan azad olmuş  7 milyon 734 min manat hesabına mənfəət 8 milyon 225 min manata yüksəlib. 

Müqayisə üçün qeyd edək ki, 2020-ci ilin ilk 6 ayında "Premium Bank"ın cəmi əməliyyat gəlirləri 25 milyon 198 min manat, cəmi əməliyyat xərcləri 22 milyon 702 min manat, gəlirlər xərcləri üstələdiyindən əməliyyat mənfəəti 2 milyon 496 min manat təşkil etmişdi. Eyni zamanda Mümkün zərərlər üçün yaradılan məqsədli ehtiyatlardan azad olmuş 5 milyon 104 min manat hesabına mənfəət 7 milyon 600 min manata yüksəlmişdi.

AKTİVLƏRİ ARTIB

2021-ci ilin 6 ayında "Premium Bank” ın cəmi aktivləri 12 milyon 789 min manat artaraq 30 İyun 2021-ci il tarixində 666 milyon 88 min manata çatıb. Aktivlərin artması nağd pul vəsaitlərinin artması ilə əlaqədardır.

İlk 6 ayda Bankın kredit portfeli (müştərilərə verilmiş kreditlər) 45 milyon 620 min manat azalaraq 524 milyon 483 min manata düşüb. Bankın biznes kreditləri portfeli 45 milyon 99 min manat azalaraq 494 milyon 400 min manata geriləyib.

30 İyun 2021-ci il tarixində "Premium Bank"da depozitlər 437 milyon 952 min manat təşkil edib, bu da ötən ilin sonu ilə müqayisədə 6 milyon 834 min manat çoxdur. Artım fiziki şəxslərin depozitlərinin artmasının hesabınadır. Belə ki, hüquqi şəxslərin depozitləri 29 milyon 636 min manat azalaraq 81 milyon 959 min manata düşüb, fiziki şəxslərin depozitləri isə 36 milyon 470 min manat artaraq 355 milyon 993 min manata yüksəlib. 

30 İyun 2021-ci il tarixində "Premium Bank" 181 milyon 145 min manat məcmu kapitala malik olub. Bank ötən ilin sonunda 17milyon 917 min manat məcmu kapitala malik idi.  Məcmu kapitalın artması xalis mənfəətin hesabınadır.