“Turanbank” ASC 2021-ci ilin 1-ci yarısını (yanvar-iyun dövrünü) 185 min manat xalis mənfəət ilə başa vurub.

Marja Bankın rüblük hesabatlarına istinadən xəbər verir ki, 2021-ci ilin yanvar-iyun dövründə “Turanbank”ın cəmi əməliyyat gəlirləri (faiz və qeyri-faiz gəlirləri ) 21 milyon 759 min manat, cəmi əməliyyat xərcləri (faiz və qeyri-faiz xərcləri) 21 milyon 261 min manat təşkil edib. Gəlirlər xərcləri üstələdiyindən Bankın 498 min manat əməliyyat mənfəəti yaranıb. Bank əməliyyat mənfəətinin 312 min manatını mümkün zərərlər üçün yaradılan məqsədli ehtiyatlara ayırdığından ilk 6 ayı 185 min manat xalis mənfəət ilə bağlayıb. 

Müqayisə üçün qeyd edək ki, 2020-ci ilin yanvar - iyun dövründə “Turanbank”ın cəmi əməliyyat gəlirləri 10 milyon 251 min manat, cəmi əməliyyat xərcləri 9 milyon 657 min manat, əməliyyat mənfəəti 594 min manat təşkil etmişdi. O cümlədən, ehtiyatdan azad olmuş 51 min manat mənfəətə əlavə edildiyindən Bank həmin dövrü 645 min manat xalis mənfəət ilə bağlamışdı.  

Gəlirlər ilə bərabər cəmi xərclərin artmasının səbəbləri faiz xərclərinin, əmək haqqı xərclərinin, ümumi və inzibati xərclərin artmasıdır. 

AKTİVLƏRİ 600 MİLYON MANATI KEÇİB

2020-ci ilin sonu ilə müqayisədə ilk 6 ayda "Turanbank"ın cəmi aktivləri 51 milyon 217 min manat aratraq 602 milyon 953 min manata, o cümlədən müştərilərə verilmiş kreditlər 22 milyon 24 min manat artaraq 373 milyon 263 min manata yüksəlib.

MƏCMU KAPİTALI ARTIB

30 İyun 2021-ci il tarixində "Turanbank" 87 milyon 658 min manat məcmu kapitala malik olub, bu da Mərkəzi Bankın minimal tələbindən (50 milyon manat) çoxdur. Bank ötən ilin sonunda 82 milyon 215 min manat məcmu kapitala malik idi. 2021-ci ilin ötən dövründə Bankın səhmdarları nizamnamə kapitalını 5 milyon manat artıraraq 80 miylon 5 min manata yüksəldiblər.

İlk yarımilin sonunda "Turanbank"da I dərəcəli kapitalının adekvatlıq əmsalı 20,8%, məcmu kapitalının adekvatlıq əmsalı 23,1% təşkil edib. Beləliklə, Bankın kapital adekvatlığı göstəriciləri tənzimləyici orqanın müəyyən etdiyi normalardan (müvafiq olaraq 5% və 10%) əhəmiyyətli dərəcədə yüksək olub.

ƏHALİNİN BANKDA ƏMANƏTLƏRİ ARTIB

İlk 6 ayda "Turanbank"da cəmi depozitlər 17 milyon 225 min manat artaraq 297 milyon 457 min manata, o cümlədən fiziki şəxslərin (əhalinin) depozitləri 8 milyon 345 min manat artaraq 222 miylon 242 min manata, hüquqi şəxslərin (şirkətlərin) depozitləri 8 milyon 880 min manat artaraq 75 milyon 215 milyon manata çatıb. Qeyd edək ki, "Turanbank" ən sərfəli şərtlər ilə əmanət qəbul edən banklardan biridir.