2021-ci ilin ilk 5 ayı ərzində əhalinin banklardakı əmanətləri 457 milyon 350 min manat artıb. Bu artım aprel-may dövründəki artımlardan qaynaqlanır. Belə ki, son iki hesabat ayında əhalinin əmanətləri 487 milyon 670 min manat artıb. Aprelin əvvəlindən əmanətlərin sığortalanması üzrə yeni şərtlər qüvvəyə minib. 05 aprel 2021-ci il tarixdən hər bir iştirakçı bankda sığortalanmış əmanət üzrə 100 min manatdan çox olmamaq şərtilə kompensasiya ödənilir. Qorunan əmanətlərin siyahısına notariusun depozit hesabına mədaxil edilmiş fiziki şəxslərə məxsus vəsaitlər və fiziki şəxslərin sahibkarlıq fəaliyyəti ilə əlaqədar açdığı bank hesablarındakı 20 min manatadək  pul vəsaitləri daxil edilmişdir.  Əmanətlərin tam sığortalanması sistemi sona çatdığından martda əhalinin əmanətləri azalmışdı.

Əhalinin əmanətləri aprel  ayında 205 milyon 440 min manat, may ayında 282 milyon 230 min manat artıb.

Ötən ilin sonunda əhalinin banklardakı əmanətləri 8 milyard 177 milyon 880 min manat, 2021-ci ilin mart ayının sonunda 8 milyard 147 milyon 480 min manat ikən, mayın sonunda 8 milyard 635 milyon 150 min manat təşkil edib.

2021-ci ilin aprel-may dövründə əhalinin milli valyutadakı əmanətləri 695 milyon 830 min manat artıb, xarici valyutadakı əmanətləri isə 208 milyon 160 min manat azalıb.

Aprel ayında devalvasiyadan sonra ilk dəfə milli valyutadakı əmanətlər xarici valyutadakı əmanətləri üstələyib. May ayının sonunda əhalinin 8 milyard 635 milyon 150 min manat cəmi əmanətlərinin 54,9%-i və ya 4 milyard 741 milyon 640 min manatı milli valyutada, 45,1%-i və ya 3 milyard 893 milyon 500 min manatı  xarici valyutada olub. Mayda xarici valyutadakı əmanətlər 4 milyard manat səviyyəsindən də aşağı düşüb.

Xatırladaq ki, 2015-ci ilin sonunda əhalinin banklardakı əmanətlərinin 85%-i xarici valyutada idi.

Əmanətlərin sığortalanması üzrə kompensasiya məbləğinin 30 min manatdan 100 min manata artırılması, Manatın məzənnəsinin sabit qalması və milli valyutada yerləşdirilən əmanətlərə yüksək faizlərin ödənilməsi manat əmanətlərinin artmasına səbəb olur.

Fiziki şəxslərin əmanətlərinin strukturu, milyon manat