“Rabitəbank” ASC 2021-ci ilin ilk rübnü (yanvar-mart dövrünü) 3 milyon 495 min manat xalis mənfəət ilə başa vurub. 2020-ci ilin eyni dövrü ilə müqayisədə Bankın xalis mənfəəti 3,1 dəfə artıb. “Rabitəbank” 2020-ci ilin ilk rübünü 1 milyon 129 min manat xalis mənfəət ilə bağlamışdı. Xalis mənfəətin artması gəlirlərin artmasından qaynaqlanır.

Marja Bankın maliyyə göstəricilərinə istinadən xəbər verir ki, 2021-ci ilin ilk rübündə “Rabitəbank”ın cəmi əməliyyat gəlirləri 18 milyon 552 min manat, cəmi əməliyyat xərcləri 12 milyon 506 min manat təşkil edib. Gəlirlər xərcləri üstələdiyindən Bankın əməliyyat mənfəəti 6 milyon 46 min manat təşkil edib. “Rabitəbank” əməliyyat mənfəətindən 2 milyon 554 min manat mümkün zərərlər üçün yaradılan məqsədli ehtiyatlara ayırıb və nəticədə ilk rübü 3 milyon 495 min manat xalis mənfəət ilə bağlayıb.

Müqayisə üçün qeyd edək ki, 2020-ci ilin ilk rübündə “Rabitəbank”ın cəmi əməliyyat gəlirləri 14 milyon 741 min manat, cəmi əməliyyat xərcləri 10 milyon 491 min manat, əməliyyat mənfəəti 4 milyon 250 min manat təşkil etmişdi. Bank əməliyyat mənfəətindən 3 milyon 121 min manat mümkün zərərlər üçün yaradılan məqsədli ehtiyatlara ayırdığından həmin dövrü 1 milyon 129 min manat xalis mənfəət ilə başa vurmuşdu.

İlk rübdə “Rabitəbank” ticarət və investisiya qiymətli kağızları üzrə faiz gəlirləri və xarici valyutadan gəliri kəskin artıb.

MÜŞTƏRİLƏRƏ VERİLMİŞ KREDİTLƏR ARTIB

31 Mart 2021-ci il tarixində “Rabitəbank” 719 milyon 914 min manat cəmi aktivlərə malik olub, o cümlədən aktivlərin 441 milyon 344 min manatını müştərilərə verilmiş kreditlər təşkil edib. Ötən ilin sonunda Bankın 830 milyon 916 min manat cəmi aktivlərinin 423 milyon 332 min manatını müştərilərə verilmiş kreditlər təşkil etmişdi. İlk rübdə “Rabitəbank”ın kredit portfeli 18 milyon 12 min manat və ya 4,3% artıb. Aktivlərin azalması əsasən hüquqi şəxslərin depoitlərinin azalması ilə nağd pul vəsaitlərinin də azalması ilə əlaqədardır.

MƏCMU KAPİTALI 100 MİLYON MANATDAN ÇOXDUR

31 Mart 2021-ci il tarixində “Rabitəbank” 100 milyon 146 min manat məcmu kapitala malik olub.