Azərbaycanın ən qocaman banklarından biri olan “Günay Bank” ASC 2021-ci ilin ilk rübünü 879 min manat xalis mənfəət ilə başa vurub.

Marja Bankın maliyyə hesabatlarına istinadən xəbər verir ki, 2021-ci ilin ilk rübündə “Günay Bank”ın cəmi əməliyyat gəlirləri (faiz və qeyri faiz gəlirləri) 5 milyon 781 min manat təşkil edib, bu da ötən ilin eyni dövrü ilə müqayisədə 9 min manat çoxdur. Ötən ilin eyni dövründə Bankın cəmi əməliyyat gəlirləri 5 milyon 772 min manat olmuşdu.

2020-ci ilin ilk rübü ilə müqayisədə 2021-ci ilin ilk rübündə “Günay Bank”ın cəmi əməliyyat xərcləri (faiz və qeyri-faiz xərcləri) 317 min manat artaraq 4 milyon 381 min manat təşkil edib. 2020-ci ilin ilk rübündə “Günay Bank”ın cəmi əməliyyat xərcləri 4 milyon 64 min manat olmuşdu.

2021-ci ilin yanvar-mart dövründə “Günay Bank”ın gəlirləri xərclərini üstələdiyindən Bankın 1 milyon 400 min manat əməliyyat mənfəəti yaranıb (ötən ilin eyni dövründə 1 milyon 708 min manat). Bank 521 min manat mümkün zərərlər üçün yaradılan məqsədli ehtiyatlara ayırdığından ilk rübü 879 min manat xalis mənfəət ilə bağlayıb. Bank 2020-ci ilin ilk rübündə 1 milyon 708 min manat əməliyyat mənfəətindən 632 min manat ehtiyatlara ayırdığından həmin dövrü 1 milyon 76 min manat xalis mənfəət ilə bağlamışdı. “Günay Bank”ın gəlirlərinin təxminən ötən ilin ilk rübündəki səviyyədə qalmasına qarşılıq xərclərinin artması xalis mənfəətinin azalmasına səbəb olub.

2020-ci ilin ilk rübü ilə müqayisədə “Günay Bank”ın faiz gəlirləri 252 min manat və ya 8% artaraq 3 milyon 382 min manat təşkil edib.

BANK BÖYÜYÜB, MÜŞTƏRİLƏRƏ VERİLMİŞ KREDİTLƏR ARTIB

31 Mart 2021-ci il tarixində “Günay Bank” 250 milyon 670 min manat cəmi aktivlərə malik olub, aktivlərin 191 milyon 304 min manatını müştərilərə verilmiş kreditlər təşkil edib. 2020-ci ilin sonunda “Günay Bank” 245 milyon 43 min manat cəmi aktivlərə, o cümlədən 190 milyon 865 min manat kredit portfelinə malik idi. “Günay Bank”ın cəmi kredit portfelnin 65,5%-ni biznes kreditləri təşkil edib.

DEPOZİTLƏR ARTIB

2021-ci ilin ilk rübündə “Günay Bank”da cəmi depozitlər 7 milyon 319 min manat artaraq 101 milyon 808 min manata çatıb. Bankda fiziki şəxslərin depozitləri 21 milyon 203 min manat artaraq 90 milyon 91 min manata yüksəlib.

31 Mart 2021-ci il tarixində “Günay Bank” ASC 65 milyon 707 min manat məcmu kapitala malik olub.