Aktivlərinin həcminə görə Azərbaycandakı 5-ci böyük bank olan “Bank Respublika” ASC 2021-ci ilin ilk rübünü 2 milyon 877 min manat xalis mənfəət ilə başa vurub. Bank ötən ilin eyni dövründə 2 milyon 885 min manat xalis mənfəət əldə etmişdi.

XƏRCLƏRİ AZALIB

“Marja” xəbər verir ki, 2021-ci ilin yanvar-mart dövründə (ilk rüb) “Bank Respublika”nın cəmi əməliyyat gəlirləri 23 milyon 23 min manat, cəmi əməliyyat xərcləri 21 milyon 449 min manat, gəlirlər xərcləri üstələdiyindən əməliyyat mənfəəti 1 milyon 574 min manat təşkil edib. Eyni zamanda, mümkün zərərlər üçün yaradılan məqsədli ehtiyatlardan 1 milyon 303 min manat azad olub və Bankın mənfəəti 2 milyon 877 min manata yüksəlib.

Müqayisə üçün qeyd edək ki, 2020-ci ilin ilk rübündə “Bank Respublika”nın cəmi əməliyyat gəlirləri 27 milyon 271 min manat, cəmi əməliyyat xərcləri 22 milyon 259 min manat, əməliyyat mənfəəti 5 milyon 12 min manat təşkil etmişdi. Bank əməliyyat mənfəətindən 2 milyon 126 min mümkün zərərlər üçün yaradılan məqsədli ehtiyatlara ayırdığından mənfəəti 2 milyon 885 min manata düşmüşdü.

BANK BÖYÜYÜB, MÜŞTƏRİLƏRƏ VERİLMİŞ KREDİTLƏR ARTIB

31 Mart 2021-ci il tarixində “Bank Respublika” 1 milyard 111 milyon 925 min manat cəmi aktivlərə malik olub. Bank ötən ilin sonunda 1 milyard 34 milyon 39 min manat cəmi aktivlərə malik idi. İlk rübdə Bankın müştərilərə verdiyi kreditlər isə 37 milyon 531 min manat artaraq 31 Mart 2021-ci il tarixində 484 milyon 398 min manata çatıb.

BANKDAKI DEPOZİTLƏR ARTIB

İlk rübdə “Bank Respublika”dakı depozitlər 689 milyon 626 min manatdan 778 milyon 836 min manata yüksəlib (89 milyon 210 min manat artıb). Bankda həm əhalinin, həm də şirkətlərin depozitlər artıb.

MƏCMU KAPİTALI ARTIB

31 Mart 2021-ci il tarixində “Bank Respublika” 87 milyon 275 min manat məcmu kapitala malik olub. Bank ötən ilin sonunda 83 milyon 893 min manat məcmu kapitala malik idi.