“Yelo Bank” ASC 2021-ci ilin ilk rübünü 5 milyon 670 min manat xalis mənfəət ilə başa vurub. Xalis mənfəətin 83%-i mümkün zərərlər üçün yaradılan məqsədli ehtiyatlardan azad olmuş vəsaitdən və xərclərin azaldılmasından qaynaqlanır. Bank ötən ilin eyni dövrünü 6 milyon 255 min manat xalis zərər ilə bağlamışdı.

GƏLİRLƏRİ AZALIB

Marja xəbər verir ki, 2021-ci ilin ilk rübündə “Yelo Bank”ın cəmi əməliyyat gəlirləri 14 milyon 441 min manat, cəmi əməliyyat xərcləri 13 milyon 462 min manat təşkil edib. Uzun müddətdən sonra Bankın gəlirləri xərclərini üstələdiyindən 979 min manat əməliyyat mənfəəti yaranıb. Eyni zamanda, mümkün zərərlər üçün yaradılan məqsədli ehtiyatlardan 4 milyon 691 min manat azad olub və Bankın mənfəəti 5 milyon 670 min manata yüksəlib. Əvvəlki dövrlərdə yaradılmış ehtiyatın bir hissəsinin azad olması bank üçün risklərin azaldığına işarədir.

Müqayisə üçün qeyd edək ki, 2020-ci ilin ilk rübündə “Yelo Bank”ın cəmi əməliyyat gəlirləri 14 milyon 788 min manat, cəmi əməliyyat xərcləri 15 milyon 369 min manat təşkil etmişdi. Xərclər gəlirləri üstələdiyindən Bankın 581 min manat əməliyyat zərəri yaranmışdı. Eyni zamanda mümkün zərərlər üçün yaradılan məqsədli ehtiyatlara 5 milyon 674 min manat ayrıldığından zərər 6 milyon 255 min manata yüksəlmişdi.

Xərclərin azalması gəlirlərin azalmasından daha çox olduğundan “Yelo Bank”ın əməliyyat mənfəəti yaranıb. Bankın faiz xərcləri 5 milyon 287 min manatdan 3 milyon 846 min manata, qeyri-faiz xərcləri isə 10 milyon 81 min manatdan 9 milyon 616 min manata geriləyib.

BANK BÖYÜYÜB, MÜŞTƏRİLƏRƏ VERİLMİŞ KREDİTLƏR ARTIB

31 Mart 2021-ci il tarixində “Yelo Bank” 401 milyon 394 min manat cəmi aktivlərə, o cümlədən 328  milyon382 min manat kredit portfelinə (müştərilərə verilmiş kreditlər) malik olub. Bank 2020-ci ilin sonunda 390 milyon 923 min manat cəmi aktivlərə, o cümlədən 308 milyon 338 min manat kredit portfelinə malik idi. “Yelo Bank” biznes və istehlak  kreditlərini artırırb. İlk rübdə biznes kreditləri portfeli 20 milyon manatdan çox artıb.

DEPOZİTLƏR AZALIB

İlk rübdə Bankda depozitlər ötən ilin sonundakı 235 milyon 158 min manatdan 229 milyon 840 min manata geriləyib. Bankda həm fiziki, həm də hüquqi şəxslərin depozitləri azalıb.

MƏCMU KAPİTALI ARTIB

Xalis mənfəət bankın məcmu kapitalının artmasına səbəb olub. 31 Mart 2021-ci il tarixində “Yelo Bank”59 milyon 392 min manat məcmu kapitala malik olub. Bank ötən ilin sonunda 53 milyon 805 min manat məcmu kapitala malik idi. Həmçinin xalis mənfəət ilə əlaqədar olaraq "YeloBank"ın yığılmış zərəri 325 milyon 120 min manatdan 319 milyon 450 min manata düşüb. 

"Yelo Bank" 2020-ci ili 39 milyon 748 min manat xalis zərər ilə başa vurmuşdu. 

2021-ci ilin yanvar ayından etibarən "Yelo Bank"ın İdarə Heyətinin sədri vəzifəsini Anar Həsənov icra etməyə başlamışdır. Anar Həsənov 325 milyon 120 min manat yığılmış zərəri olan Bankın “sükanı” arxasına keçmişdir.

Tanınmış Azərbaycan əsilli iş adamı, milyarder Vahid Ələkbərov "Yelo Bank" ASC-nin əsas səhmdarıdır.