“Ziraat Bank Azərbaycan” ASC 2021-ci ilin 1-ci rübünü 492 min manat xalis mənfəət ilə başa vurub.

Marja Bankın maliyyə göstəricilərinə istinadən xəbər verir ki, 2021-ci ilin ilk rübündə “Ziraat Bank Azərbaycan”ın cəmi əməliyyat gəlirləri 7 milyon 130 min manat, cəmi əməliyyat xərcləri 5 milyon 645 min manat, əməliyyat mənfəəti 1 milyon 485 min manat təşkil edib. Bank əməliyyat mənfəəətindən 992 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırdığından ilk rübü 492 min manat xalis mənfəət ilə bağlayıb.

Müqayisə üçün qeyd edək ki, 2020-ci ilin ilk rübündə “Ziraat Bank Azərbaycan”ın cəmi əməliyyat gəlirləri 5 milyon 646 min manat, cəmi əməliyyat xərcləri 3 milyon 762 min manta təşkil etmiş, gəlirlər xərcləri üstələdiyindən Bankın 1 milyon 883 min manat əməliyyat mənfəəti yaranmışdı. “Ziraat Bank Azərbaycan” əməliyyat mənfəətinin 1 milyon 270 min manatını aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırdığından həmin ilin ilk rübünü 612 min manat xalis mənfəət ilə bağlamışdı.

2020-ci ildə “Ziraat Bank Azərbaycan”ın faiz gəlirləri 4 milyon 157 min manat ikən, 2021-ci ilin ilk rübündə 5 milyon 578 min manata yüksəlib. Qeyri-faiz gəlirləri isə 1 milyon 489 min manatdan 1 milyon 552 min manata qalxıb. Xalis mənfəətin azalması xərclərin artması ilə əlaqədardır. Hazırda “Ziraat Bank Azərbaycan” yeni texnologiyaların tətbiqinə və filial şəbəkəsinin genişləndirilməsinə investisiyalar yatırır. 

BANK BÖYÜYÜB, MÜŞTƏRİLƏRƏ VERİLMİŞ KREDİTLƏR ARTIB

31 Mart 2021-ci il tarixində “Ziraat Bank Azərbaycan” ASC 328 milyon 577 min manat cəmi aktivlərə, o cümlədən 167 milyon 853 min manat kredit portfelinə (müştərilərə verilmiş kreditlər) malik olub. Bank ötən ilin sonunda 298 milyon 961 min manat cəmi aktivlərə və 158 milyon 309 min manat kredit portfelinə malik idi.

31 Mart 2020-ci il tarixində isə “Ziraat Bank Azərbaycan” 249 milyon 396 min manat cəmi aktivlərə malik olmuş, aktivlərin 150 milyon 765 min manatını müştərilərə verilən kreditlər təşkil etmişdi.

İlk rübdə Bankda cəmi depozitlər isə 151 milyon 868 min manatdan  181 milyon 242 min manata yüksəlib (29 milyon 374 min manat artım).

MƏCMU KAPİTALI ARTIB

31 Mart 2021-ci il tarixində “Ziraat Bank Azərbaycan” ASC 71 milyon 62 min manat məcmu kapitala malik olub. 31 Dekabr 2020-ci il tarixində “Ziraat Bank Azərbaycan” 70 milyon 83 min manat məcmu kapitala malik idi.

Qeyd edək ki, “Ziraat Bank Azərbaycan” ASC-nin səhmdarları “T.C.Ziraat Bankası Anonim Şirkəti” (99.98%), “Ziraat Sigorta Anonim Şirkəti”  (0.01%) və  “Ziraat Yatırım Menkul Değerler Anonim Şirkəti”dir (0.01%).