Məşhur ABŞ müəllifi, enerji mütəxəssisi, iqtisadi tarixçi və IHS Markit tədqiqat və informasiya şirkətinin rəhbəri, Xarici Əlaqələr Şurası adlı QHT-nin direktoru, ABŞ Enerji Assosiasiyasının prezidenti və enerji sahəsində Pulitzer mükafatına layiq görülən bir sıra kitabların müəllifi Daniel Hovard Yergin (Dan Yergin) neft bazarındakı proseslər haqqında öz mülahizələrini açıqlayıb.

Marja xəbər verir ki, CNBC kanalına müsahibə verən Yergin neftin cari ildəki ağlabatan və ədalətli qiymətinin 60-75 dollar ətrafında dəyişməli olduğunu bildirib.

Ekspert ötən ilin aprelində OPEC və onun müttəfiqləri tərəfindən hasilatın gündəlik 9,7 milyard barrel azaldılması barədə razılığa gəlinməsindən bəri hələ də “kifayət qədər iri həcmli artıq neft” qaldığını və onun bazar geri qaytarılmadığını qeyd edib: “ABŞ iqtisadiyyatı dirçəlir. Çin artıq özünə gəlib. Əgər dünyanın qalan hissəsi də iqtisadi fəallığı bərpa etsə, o zaman neftin qiymətinin 60-75 dollar aralığında olacağını düşünürəm. Bu qiyməti bizə bazar diqtə edir”.

Xatırladaq ki, martın ortalarında ABŞ-ın qocaman investisiya şirkəti Piper Sandlerin texniki-strateji analitiki Kreyq Conson neft qiymətlərinin bu il 100 dolları ötə biləcəyini iddia etmişdi.

Dan Yergin bu fikirlə razılaşmayaraq, hələ də böyük həcmdə neftin ehtiyatda qaldığını və qlobal iqtisadi artım ehtiyaclarını müəyyən müddətə tam qarşılaya biləcəyini qeyd edir: “Tələb-təklif balansının təzyiqi böyüyəcək və hasilatı artırmaq lazım gələcək, ABŞ da hasilatda öz payını yenidən bərpa edəcək. Amerika hiper iqtisadi sürətlə özünə gəlir, Çin artıq böyük ölçüdə istehsal sahələrini bərpa edib və bu mütləq tələbatı artıracaq. Ən böyük əminsizlik hazırda Avropa ilə bağlıdır, çünki karantin tədbirlərinin nə zaman bitəcəyini və Avropanın yenidən böyüməyə başlayacağını proqnozlaşdırmaq çətindir”.

Hazırda Brent markalı neftin bir barreli 67 dollardan satılır, Qərbi Texas nefti isə təxminən 64 dollara təklif olunur.