Yaponiyanın Maliyyə Nazirliyi bu həftə ilin əvvəlindən aparılan qlobal maliyyə əməliyyatlarının həcmini açıqlayıb.

Marja-nın məlumatına görə, məlum olub ki, son 5 ildə ilk dəfə olaraq yapon investorları Böyük Britaniyanın dövlət istiqrazlarına ən iri həcmli kapital qoyuluşu edib. Bu ilin yanvar ayında yaponlar ingilislərdən 714 milyard yen (5 milyard funt-sterlinq) həcmində qiymətli kağız satın alıb.

Ötən il dekabrın 30-da Avropa İttifaqı ilə Böyük Britaniya arasında imzalanan yeni Azad Ticarət və Əməkdaşlıq Sazişi və Brexitlə bağlı iqtisadi narahatçılığın azalması fonunda investisiya menecerləri öz portfellərində Britaniya istiqrazlarının payını artırmaqda qərarlıdır.

“Brexitlə bağlı qeyri-müəyyənlik arxada qalıb, bu isə investorlarda əminliyi artırır” - Yaponiyanın MUFG bankının dünya bazarlarının araşdırılması departamentinin rəhbəri Derek Halpenni bildirir. Onun sözlərinə görə, yeni yatırımlar onu göstərir k, investorlar “uzun müddətli investisiya çatışmazlığı” dövründən sonra istiqraz portefilində normal vəziyyətə qayıdır.

Xatırladaq ki, 2016-cı ildən - Britaniyada keçirilən referendumda Avropa İttifaqından çıxmaq barədə qərar verilməsindən sonra yapon investorları 2020-ci ilə qədər öz portfellərində olan Britaniya istiqrazlarını satmağa üstünlük verirdilər. Bu müddətdə demək olar ki, heç bir iri səhmdar ingilislərin qiymətli kağızlarına maraq göstərməyib, çünki investisiya riskinin həddən artıq yüksək olduğu qənaətində idilər.

Yaponiyanın aparıcı maliyyə xidmətləri şirkəti Nomura Hondings-in baş iqtisadçısı Hideki Kişida qeyd edir ki, yanvar ayında baş tutan alqı-satqı Yaponiyanın pensiya fondlarının və həyat sığortası şirkətlərinin Britaniya bazarına marağının yenidən canlandığını göstərir. Ümumiyyətlə, xarici dövlətlərin borc kağızları yapon təqaüdçüləri və sığortaçılar üçün cəlbedici gəlir vasitəsidir, çünki Yaponiyanın suveren dövlət istiqrazları ilə müqayisədə ABŞ və Avropa obliqasiyaları daha yüksək gəlirlilik vəd edir.

Həmçinin oxu

Dünya səhm birjaları iki həftəlik maksimuma çatıb – YENİ CANLANMA