Cari ilin fevral ayının sonuna “Muğanbank” ASC-nin müştərilərə verilmiş kredit portfeli 2020-ci il ilə müqayisədə 11 milyon 113 min manat artaraq, 347 milyon 59 min manat təşkil etmişdir. Ötən il bu rəqəm 335 milyon 946 min manat təşkil etmişdi.

Bu, Bankın yaydığı məlumatda bildirilir. 

BANK DAHA DA BÖYÜYÜB

Məlumatda qeyd edilib ki, “Muğanbank” ASC-nin cəmi aktivləri 2020-ci ilin sonundakı 590 milyon 906,22 min manatdan 12 milyon 410,59 min manat artaraq, cari ilin fevral ayının  sonuna 603 milyon 316,81 min manata yüksəlmişdir.

Cari ildə “Muğanbank” ASC yüksək Ani Likvidlik Əmsalı göstəricisi nümayiş etdirmişdir. Belə ki, müvafiq əmsal 2020-ci ilin sonunda 56.85%-dən 2021-ci il fevral ayının sonuna 81.14%-ə yüksəlmişdir ki, bu da bankın likvidliyinin adekvat səviyyədə olmasını göstərir.

MƏCMU KAPİTALI 94 MİLYON MANATI AŞIB

Dövr ərzində bankın məcmu kapitalında da artım müşahidə olunmuşdur.  “Muğanbank” ASC-nin məcmu kapitalı 2020-ci il dekabr ayının sonuna 91 milyon 696,99 min manat təşkil etmişdir. 2021-ci il fevral ayının sonuna olan vəziyyətə isə bu göstərici 2 milyon 354,33 min manat artaraq  94 milyon 51,32 min manat olmuşdur.

2 AYDA 2 MİLYON MANATDAN ÇOX XALİS MƏNFƏƏT

“Muğanbank” ASC ötən ili 707,44 min manat xalis mənfəətlə başa vurmuşdur. 2021-ci ilin fevral ayının göstəricisinə əsasən bankın xalis mənfəəti 2 milyon 52,67 min manat təşkil etmişdir ki, bu da ötən ilin sonu ilə müqayisədə 1 milyon 345.23 min manat çoxdur.

Azərbaycan maliyyə-bank sektorunun tanınmış qurumlarından biri olan " Muğanbank" ASC 1992-ci ildə fəaliyyətə başlamışdır. Hal-hazırda Bankın ölkə ərazisində 27 filialı və 10 şöbəsi, həmçinin Moskva şəhərindəki nümayəndəliyi hər növ bank məhsulları üzrə keyfiyyətli xidmət göstərir. "Muğanbank" ASC ABŞ Beynəlxalq İnkişaf Agentliyi (USAID), ICBC Bank - Industrial and Commercial Bank of China təşəbbüsü ilə yaradılan “Belt and Road Bankers Roundtable Mechanism” (BRBR - “Bir Kəmər-Bir Yol” Banklarının Dəyirmi Masası), Avropa Yenidənqurma və İnkişaf Bankı (EBRD), Beynəlxalq Maliyyə Korporasiyası (IFC), ABŞ-ın WorldBusiness Capital (WBC) investisiya fondu, Xarici Özəl İnvestisiyalar Korporasiyası (OPIC), Özəl Sektorun İnkişafı üzrə İslam Korporasiyası (ICD), İnkişaf üçün Yaşıl Fond (GGF), Cənub-Şərqi Avropa üzrə Avropa Fondu (EFSE), Almaniya Əmanət Banklarının Beynəlxalq Əməkdaşlıq Fondu (SBFIC) kimi beynəlxalq iqtisadi qurumlarla əməkdaşlıq edir.