"Ərzaq məhsullarının, tikinti məhsullarının qiymətləri tələb və təklif əsasında formalaşır, bu məhsulların qiymətlərinin süni müdaxilə ilə tənzimlənməsi düzgün deyil".

Marjanın məlumatına görə, bunu Antiinhisar və İstehlak Bazarına Nəzarət Dövlət Xidmətinin “2020-ci ilin yekunları” adlı onlayn konfransda Xidmətin rəis müavini Məmməd Abbasbəyli bildirib.

Xidmətin rəis müavini "ərzaq məhsulları üzrə 57 adda, meyvə-tərəvəz məhsulları üzrə 28 adda, tikinti məhsulları üzrə 51 adda məhsulun monitorinqini aparırıq" deyərək çıxışına belə davam edib: 

"Ölkəmizdə Tarif Şurası tərəfindən tənzimlənən qiymətlər istisna olmaqla digər qiymətlər azad bazar iqitsadiyyatı sisteminin qaydaları ilə - tələb və təklif əsasında formalaşır. Biz gündəlik monitorinqlər aparırıq. Bizim monitorinqlərin məqsədi  antiinhisar qanunvericiliyinin pozulması əlamətlərini, sövdələşmələri aşkar etməkdir. Açığını deyim, bu gün qiymətlərin süni artırılması üzrə hansısa qanun pozuntusu aşkar etməmişik. Müəyyən kateqoriya məhsulların qiymətləri qlobal bazarlarda yüksəlməkdədir. Ölkəmizdə bu məhsulların böyük həcmdə istehsalı yoxdur. Məsələn, şəkər tozu, yağ məhsulları və s. Biz dünya birjalarını da izləyirik və görürük ki, böyük faizlər ilə qlobal birjalarda bahalaşmalar baş verir və bununla əlaqədar olaraq Azərbaycanda da qiymət artımları yaranır".

"HÖKMRAN ŞİRKƏTLƏR QİYMƏTLƏR İLƏ OYNASA TƏDBİR GÖRÜLÜR"

Məmməd Abbasbəyli əlavə edib ki, qiyməti dövlət tərəfindən tənzimlənən qiymətlərdən (benzin, dərman və s.) kənaraçıxma qanun pozuntusudur:

"Əgər tənzimlənən qiymətlərdən kənaraçıxma varsa, o qanun pozuntusudur. Bazarda hökmran mövqeyə malik olan şirkətlər var. Qanunvericiliyə görə, hansısa şirkətin bazar payı 35% və bundan yuxarıdırsa o hökmran mövqeyə malik şirkət sayılır. Biz hökmran mövqeyə malik şirkətlərin bazarda qiymətləri manipulyasiya edib-etmədiklərini izləyirik. Belə şirkətlər qiymətlər ilə oynayarlarsa, biz tədbirlər görürük. Əgər şirkət bazarda hökmran mövqeyə malik deyilsə, yəni qiymətləri oynada bilmirsə, bu zaman qiymətlər tələb və təklif əsasında formalaşır. Burada qiymət artımına süni demək doğru deyil və Dövlət Xidmətinin də bu halda tədbir görməsi qanunvericilikdə nəzərdə tutulmayıb. Bu sahədə son müddətdə süni qiymət artımı müşahidə edilməyib".

Həmçinin oxu

Azərbaycanda tenderlərin iştirak haqları aşağı salınacaq