Azərbaycanda fəaliyyət göstərən 26 bankdan 7-nin ötən il xüsusi ehtiyatlara ayırmaları əvvəlki illə müqayisədə çox olub.

Bunlar “Rabitəbank”, “Yelo Bank”, “Naxçıvan Bank”, “Xalq Bank”, “Zıraat Bank Azərbaycan”, “Yapı Kredi Bank Azərbaycan” və “Günay Bank”dır.

Ən yüksək dinamika “Rabitəbank”da (46,9 dəfə), ən aşağı dinamika isə “Günay Bank”da (31,8% çox) qeydə alınıb.

7 bankın – “AFB Bank”, “Bank Respublika”, “PAŞA Bank”, “Turan Bank”, “Unibank”, İran Milli Bankının Bakı filialı və “Azər-Türk Bank”ın isə xüsusi ehtiyatlara ayırmaları azalıb. Ən çox azalma “Azər-Türk Bank”da (99,3%), ən az azalma isə “AFB Bank”da (17,1%) qeydə alınıb.

3 bankın – “Bank VTB Azərbaycan”, “Bank of Baku” və Pakistan Milli Bankının Bakı filialının xüsusi ehtiyatlara ayırmalar üzrə qənaəti azalıb. Müvafiq olaraq 13,7%, 85% və 93,9%.

4 bank – “Azərbaycan Beynəlxalq Bankı”, “Bank Avrasiya”, “Bank BTB” və “Express Bank” ötən il xüsusi ehtiyatlara üzrə vəsait ayırıb, əvvəlki il isə qənaət edib, 5 bank – “Access Bank”, “Azərbaycan Sənaye Bankı”, “Kapital Bank”, “Muğan Bank” və “Premium Bank” isə ötən il xüsusi ehtiyatlar üzrə qənaət edib, əvvəlki il isə vəsait ayırıb. Odur ki, bu bankların xüsusi ehtiyatlar üzrə ayırmalarının / qənaətinin dinamikasını hesablamaq mümkün olmayıb.

Azərbaycanda 8 bank ötən il xüsusi ehtiyatlara vəsait ayırmayıb

Azərbaycanda fəaliyyət göstərən 26 bankdan 8-i ötən il xüsusi ehtiyatlara vəsait ayırmayıb.

Bunlar Pakistan Milli Bankının Bakı filialı, “Access Bank”, “Azərbaycan Sənaye Bankı”, “Premium Bank”, “Muğan Bank”, “Bank of Baku”, “Bank VTB Azərbaycan” və “Kapital Bank”dır.

Başqa sözlə, bu banklar xüsusi ehtiyatlara ayırmalar üzrə qənaət ediblər. Bu baxımdan ən yüksək göstərici “Kapital Bank”da (25,546 milyon manat), ən aşağı göstərici isə Pakistan bankında (2 min manat) qeydə alınıb.

Qalan 18 bank isə müxtəlif məbləğlərdə ehtiyatlar yaradıb. Ayırmaların ən yüksək həddi “Yelo Bank”da (37,303 milyon manat), ən aşağı həddi isə “Azər-Türk Bank”da (10 min manat) qeydə alınıb.

“Renkinq”