Bank BTB 2020-ci il üzrə maliyyə göstəricilərini açıqlayıb. Ötən il Bankın gəlirləri artıb.

Marja Bankın maliyyə hesabatlarına istinadən xəbər verir ki, 2020-ci ildə Bank BTB-nin cəmi əməliyyat gəlirləri (faiz və qeyri-faiz gəlirləri) 31 milyon 138 min manat, cəmi əməliyyat xərcləri (faiz və qeyri-faiz xərcləri) 29 milyon 194 min manat təşkil edib. Gəlirlər xərcləri üstələdiyindən Bankın 1 milyon 944 min manat əməliyyat mənfəəti yaranıb. Bank aktivlər üzrə mümkün zərərlərin ödənilməsi üçün xüsusi ehtiyatın yaradılmasına 11 milyon 75 min manat ayırdığından ötən ili 9 milyon 130 min manat xalis zərər ilə başa vurub.

Müqayisə üçün qeyd edək ki, 2019-cu ildə Bank BTB-nin cəmi əməliyyat gəlirləri 28 milyon 814 min manat, cəmi əməliyyat xərcləri 26 milyon 157 min manat, əməliyyat mənfəəti 2 milyon 657 min manat təşkil etmişdi. Eyni zamanda ehtiyatlardan azad olmuş 4 milyon 865 min manat da mənfəətə əlavə edilmişdi. Bu səbəbdən Bank BTB 2019-cu ili 7 milyon 523 min manat xalis mənfəət ilə bağlamışdı.

Ötən il Bank BTB-nin əməliyyat gəlirləri 2 milyon 324 min manat, əməliyyat xərcləri isə 3 milyon 37 min manat artıb. Ötən il xərclərin gəlirlərdən daha çox artması ilə əlaqədar olaraq əməliyyat mənfəəti 713 min manat daha az olub.

2020-ci ildə Bank BTB-nin xalis zərərinin yaranması xərclərinin artması vəbankın mümkün zərərlər üçün yaradılan məqsədli ehtiyatlara vəsait ayırması ilə əlaqədardır. 2019-cu ildə isə ehtiyatlardan azad olmuş vəsait mənfəətə əlavə edilmişdi.

2019-cu illə müqayisədə 2020-ci ildə Bank BTB-nin faiz gəlirləri 4 milyon 30 min manat artıb.

BANKIN AKTİVLƏRİ ARTIB

31 Dekabr 2020-ci il tarixində Bank BTB 356 milyon 137 min manat cəmi aktivlərə, o cümlədən 206 milyon 96 min manat xalis kredit portfelinə malik olub. Bank 2019-cu ilin sonunda 341 milyon 542 min manat cəmi aktivlərə, o cümlədən 206 milyon 649 min manat xalis kredit portflinə malik idi. Bankın aktivlərinin artması, əsasən, qiymətli kağızlara investisiyaların və digər banklarda depozitlərin artırılması ilə əlaqədardır.

Ötən il Bank BTB-nin digər banklardakı  depozitləri 8 milyon 671 min manat və ya 67% artaraq 21 milyon 594 min manata yüksəlib.

Ötən il Bank BTB-nin qiymətli kağızlara investisiyaları isə 6 dəfə artaraq 15 milyon 38 min manata çatıb.

DEPOZİTLƏR ARTIB

2019-cu illə müqayisədə 2020-ci ildə Bank BTB-də depozitlər 6 milyon 3 min manat və ya 4,5% artaraq 139 milyon 347 min manata yüksəlib.

2020-ci ilin sonunda Bank BTB52 milyon 727 min manat məcmu kapitala malik olub. Bank 2019-cu ilin sonunda 62 milyon 99 min manat məcmu kapitala malik idi. Məcmu kapitalın azalması - gələcəkdə yarana biləcək potensial risklərin qarşılanması məqsədi ilə bank tərəfindən mühafizəkar yanaşma tətbiq edilərək ehtiyat yaradılması ilə əlaqədardır.