“Bank of Baku” ASC 2020-ci ili 12 milyon 673 min manat xalis mənfəət ilə başa vurub. Xatırladaq ki, Bank 2019-cu ili 24 milyon 571 min manat xalis mənfəət ilə bağlamışdı.

GƏLİRLƏRİ ARTIB

Marja Bankın maliyyə göstəricilərinə istinadən xəbər verir ki, “Bank of Baku”nun 2019-cu ildə 43 milyon 25 min manat təşkil etmiş faiz gəlirləri 2020-ci ildə 53 milyon 602  min manat təşkil edib (ötən il 10 milyon 577 min manat artıb). Bankın qeyri-faiz gəlirləri isə 9 milyon 176 min manatdan 9 milyon 398 min manata yüksəlib (ötən il 222 min manat artıb).

ƏMƏLİYYAT MƏNFƏƏTİ KƏSKİN ARTIB

Ötən il Bank of Bakunun cəmi faiz və qeyri-faiz gəlirləri 10 milyon 799  min manat, cəmi faiz və qeyri-faiz xərcləri isə 4 milyon 544 min manat artıb. Gəlirlərin artması xərclərin artmasını üstələdiyindən (xalis artım 6 milyon 255 min manat) Bankın əməliyyat mənfəəti 7 milyon 274 min manatdan 13 milyon 529 min manata yüksəlib.  

Bank of Bakunun xalis mənfəətinin azalması bankın cari biznes fəaliyyətindən qaynaqlanmır, azalma mümkün zərərlər üzçün əvvəlki dövrlərdə yaradılmış ehtiyatdan azad olan vəsaitin azalması ilə əlaqədardır. Əgər 2019-cu ildə ehtiyatdan 24 milyon 258 min manat azad olaraq mənfəətə əlavə edilmişdirsə, 2020-ci ildə bu rəqəm 3 milyon 648 min manat təşkil edib. 

BANK BÖYÜYÜB

2019-cu illə müqayisədə 2020-ci ildə Bank of Baku-nun cəmi aktivləri 28 milyon 469 min manat artaraq 409 milyon 563 min manata çatıb. Ötən il müştərilərə verilmiş kreditlər cüzi – 212 min manat azalaraq ilin sonunda 337 milyon 946 min manat təşkil edib.

Ötən il Bank of Baku biznes kreditləri portfelini 13 milyon 16 min manat artıraraq 94 milyon 940 min manata, daşınmaz əmlak kreditləri portfelini isə 4 milyon 538 min manat artıraraq 13 milyon 293 min manata çatdırıb. Bankın istehlak kreditləri portfeli isə 16 milyon 217 min manat azalaraq 229 milyon 713 min manata düşüb.

DEPOZİTLƏR ARTIB

Ötən il Bank of Bakuda cəmi depozitlər 10 milyon 262 min manat artaraq 193 milyon 485 min manata çatıb, o cümlədən fiziki şəxslərin depozitləri 15 milyon 476 min manat artaraq 171 milyon 531 min manata, hüquqi şəxslərin depozitləri isə 3 milyon 787 min manat artaraq 21 milyon 954 min manata qalxıb. 

MƏCMU KAPİTALI ARTIB

31 Dekabr 2020-ci il tarixində Bank of Baku 88 milyon 43 min manat məcmu kapitala malik olub. 31 Dekabr 2019-cu il tarixində "Bank of Baku" 54 milyon 224 min manat məcmu kapitala malik idi.