Tarif Şurası yanacağın bahalaşmasının kənd təsərrüfatı və avtomobil nəqliyyatı ilə sərnişindaşıma sahələrinə mənfi təsir etməyəcəyini gözləsə də, marketlərdə məhsulların satış qiymətləri yüksələ bilər.

Marja-nın məlumatına görə, qida məhsulları istehsalı üçün tələb olunan xammallar istehsal müəssisəsinə, hazır məhsullar da istehsal müəssisəsindən satış nöqtələrinə nəqliyyat vasitələri ilə daşınır.  Aİ-92 markalı benzinin 11%, dizel yanacağının isə 33% bahalaşması istehsal və ticarət şirkətlərinin xərclərini artıracaqdır. Tarif Şurasının qərarından sonra marketlərdəki qiymət artımlarına görə istehsal və ticarət şirkətlərini qiymətləri süni artırmaqda ittiham etmək əsassızdır. Yəni, qiymət artımları əsaslı olacaqdır.

Ölkədə dizel yanacağına olan qiymət artımının kənd təsərrüfatına, həmçinin ictimai nəqliyyatda sərnişindaşıma xidmətlərinə edə biləcəyi mənfi təsirin qarşısını almaq məqsədilə müəyyən qabaqlayıcı tədbirlər nəzərdə tutulub. Təsirin neytrallaşdırması üçün sərnişindaşıma ilə məşğul olan sahibkarlıq subyektlərinə kompensasiya ödənilməsi nəzərdə tutulur. Kənd təsərrüfatında fermerlərə verilən subsidiyaların məbləğinə yenidən baxılacaq.

Fermerlərə verilən subsidiyanın artırılması aqrar məhsulların bahalaşmayacağını istisna etmir. Çünki meyvə və tərəvəzlər bölgələrdən satış nöqtələrinə ticarətçilər tərəfindən nəqliyyat vasitələri ilə daşınır. Daşıma xərclərinin artması meyvə və tərəvəz qiymətlərinin də yüksəlməsinə səbəb ola bilər.

Yanacaqların bahalaşması dolayı yolla digər sahələrdə də qiymət artımlarına səbəb ola bilər. Bir sıra qeyri-ərzaq məhsullarının qiymətlərində də artım baş verəcəyi gözələnilir. 

Eyni zamanda, yanacaqların bahalaşması şəxsi avtomobilləri ilə işə gedib gələnlərin xərclərini artırır. Bununla əlaqədar olaraq şirkətlər işçilərin əməkhaqlarını yüksəltmək məcburiyyətində qala bilərlər. Belə olan halda məhsul və xidmətlərin maya dəyəri, yekunda da pərakəndə satış qiymətləri yüksələcəkdir.

Xəbər verdiyimiz kimi, Tarif Şurasının qərarına əsasən, yanvarın 5-dən Azərbaycanda "Aİ-92" benzininin və dizel yanacağının qiymətləri artırılıb. Qiymətlər müvafiq olaraq 0,9 manatdan 1 manatadək və 0,6 manatdan 0,8 manatadək artırılıb.

Hökumət bəyan edib ki, tarif tənzimlənməsindən sui-istifadəyə, əsassız qiymət artımına yol verilməməsi üçün nəzarət tədbirləri həyata keçiriləcəkdir.