Azərbaycanın ən böyük bankı olan “Azərbaycan Beynəlxalq Bankı” ASC 2020-ci ilin 9 ayı (yanvar-sentyabr) üzrə maliyyə göstəricilərini açıqlayıb.

Marja xəbər verir ki, 2020-ci ilin yanvar-sentyabr dövründə “Azərbaycan Beynəlxalq Bankı”nın cəmi əməliyyat gəlirləri 390 milyon 974 min manat, cəmi əməliyyat xərcləri 190 milyon 420 min manat təşkil edib. Gəlirlər xərcləri üstələdiyindən Bankın 200 milyon 554 min manat əməliyyat mənfəəti yaranıb. “Azərbaycan Beynəlxalq Bankı” əməliyyat mənfəətindən 23 milyon 826 min manat mümkün zərərlər üçün yaradılan məqsədli ehtiyata ayırıb, 41 milyon 331 min manat mənfəət vergisi ödəyib. Nəticədə, “Azərbaycan Beynəlxaıq Bankı” cari ilin 9 ayını 135 milyon 397 min manat xalis mənfəət ilə başa vurub.

KREDİTLƏRDƏN FAİZ GƏLİRLƏRİ ARTIB

“Azərbaycan Beynəlxalq Bankı”nın müştərilərə verilmiş kreditlərdən əldə etdiyi faiz gəlirləri artıb. Belə ki, müştərilərə verilmiş kreditlər üzrə faiz gəlirləri 35 milyon 518 min manat və ya 24,6% artaraq 179 milyon 801 min manat təşkil edib. Banklar və digər maliyyə institutlarındakı depozitlər üzrə faiz gəlirləri 49 milyon 79 min manat və ya 38,8% azalaraq 77 milyon 333 min manata, qiymətli kağızlar üzrə faiz gəlirləri isə 7 milyon 857 min manat və ya 20,2% azalaraq 30 milyon 928 min manata düşüb.

30 sentyabr 2020-ci il tarixində “Azərbaycan Beynəlxalq Bankı” 8 milyard 187 milyon 558 min manat cəmi aktivlərə malik olub. Ötən ilin sonu ilə müqayisədə Bankın cəmi aktivləri 1 milyard 35 milyon 803 min manat və ya 11,2% azalıb. Azalma nağd pul vəsaitlərinin azalması ilə bağlıdır.

MÜŞTƏRİLƏRƏ VERİLƏN KREDİTLƏR ARTIB

2020-ci ilin 9 ayı ərzində “Azərbaycan Beynəlxalq Bankı”nın müştərilərə verdiyi cəmi kreditlər 99 milyon 316 min manat artaraq 30 sentyabr 2020-ci il tarixində 2 milyard 474 milyon 300 min manata çatıb.

30 sentyabr 2020-ci il tarixində  “Azərbaycan Beynəlxaıq Bankı” 1 milyard 112 milyon 509 min manat məcmu kapitala malik olub.